საქართველოს სახელმწიფო ელექტროსისტემამ ქედის მუნიციპალიტეტის სოფელ კოკოტაურში არსებული ერთი ანძის დემონტაჟი სრულად განახორციელა და ახლა ანძის დასადგმელად საჭირო ადგილის შერჩევაზე მუშაობენ.
ელექტროსისტემაში განმარტავენ, რომ ანძის განსათავსებლად სოფლიდან მოსახლეობის განსახლება ან მიწის კერძო მფლობელებისგან გამოსყიდვა საჭირო არ იქნება.
„ანძის დემონტაჟი სრულად განხორციელდა. რკინის კონსტრუქციები გამოვიტანეთ. ამ ეტაპზე ალტერნატიული ადგილის შერჩევაზე ვმუშაობთ. ანძა, სავარაუდოდ, მიმდებარე ტერიტორიაზე განთავსდება, რადგან ადგილის რადიკალურად შეცვლა რამდენიმე ანძის ადგილმონაცვლეობას გამოიწვევს. მოსახლეობის განსახლება, ან მიწის გამოსყიდვა კერძო მფლობელებისგან, სავარაუდოდ, არ დარჩება საჭირო, ამის გათვალისწინებით ვცდილობთ ადგილის შერჩევას. რამდენიმე ვარიანტზე გვაქვს აქცენტი გამახვილებული. პირველადი ტექნიკური მონაცემებით შერჩეული ტერიტორიის გეოლოგიური კვლევა ჩატარდება“ – აცხადებს საქართველოს სახელმწიფო ელექტროსისტემის ქსელის ელექტროგადამცემი ხაზის განვითარების პროექტის მენეჯერი, დავით უთმელიძე.
სოფელ კოკოტაურში ანძისა და ხაზის დემონტაჟის გადაწყვეტილება ელექტროსისტემამ გეოლოგიური დასკვნის დადებამდე, ვიზუალური დათვალიერების საფუძველზე მიიღო. დავით უთმელიძის ინფორმაციით, იმ ადგილის, სადაც ანძა იდგა, გეოლოგიური დასკვნის შედეგები, ამ დრომდე არ არის ცნობილი.
ქედა, კოკოტაური / ადგილი სადაც ელექტროსისტემამ ახალაშენებული ანძის დემონტაჟი მოახდინა / 22.03.2018
