ბათუმის მერიის არქიტექტურისა და ურბანული დაგეგმვის სამსახურის უფროსის მოვალეობის შემსრულებლის, მირიან მეტრეველის ინფორმაციით, დაახლოებით ერთ თვეში ბათუმის მერია ქალაქის მიწათსარგებლობის გენერალური გეგმის მომზადებაზე კონკურსს გამოაცხადებს – ამის შესახებ მირიან მეტრეველმა დღეს „დემოკრატიული ჩართულობის ცენტრის“ ოფისში გამართულ შეხვედრაზე განაცხადა.
საჯარო შეხვედრაზე ისტორიული განაშენიანების ზონებთან დაკავშირებული დოკუმენტები განიხილეს, რომლებიც „გეოგრაფიკმა“ მოამზადა. ეს დოკუმენტი მერიამ საკრებულოში უკვე წარადგინა და მის დამტკიცებას ერთ თვეში ელის.
„…რაც შეეხება მიწათსარგებლობის გენერალურ გეგმას, ამაზე მიმდინარეობს მუშაობა და დაახლოებით ერთ თვეში გამოცხადდება კონკურსი. ამას თავისი ვადები აქვს და ალბათ წელიწად-ნახევარში უკვე გვექნება დოკუმენტი,“ – აცხადებს მირიან მეტრეველი.
ისტორიული განაშენიანების დაცვის ზონის დამტკიცებასთან დაკავშირებული დოკუმენტის საჯარო განხილვას დღეს ხელოვნებათმცოდნე თამარ ამაშუკელი ესწრებოდა. მან ისაუბრა ამ ზონების მნიშვნელობაზე და დამსწრე საზოგადოებას განუმარტა, თუ როგორ შეუწყობს ეს ხელს კულტურული მემკვიდრეობის ძეგლების, ქალაქის ისტორიული ნაწილის დაცვას. თამარ ამაშუკელმა აუდიტორიის შეკითხვებსაც უპასუხა.
შეხვედრას ბათუმის მერი ლაშა კომახიძე, ორგანიზაცია „ბათომი“, არასამთავრობო ორგანიზაციების წარმომადგენლები და დეველოპერები ესწრებოდნენ.
