Batumelebi | აუდიტი: ბათუმის მერიას არ აქვს დოკუმენტი, რომ 32 ტონა საწვავი მოვალეობის შესრულებისთვის გახარჯა აუდიტი: ბათუმის მერიას არ აქვს დოკუმენტი, რომ 32 ტონა საწვავი მოვალეობის შესრულებისთვის გახარჯა – Batumelebi
RU | GE  

აუდიტი: ბათუმის მერიას არ აქვს დოკუმენტი, რომ 32 ტონა საწვავი მოვალეობის შესრულებისთვის გახარჯა

სახელმწიფო აუდიტის ანგარიშის თანახმად, 2016 წელს, ბათუმის მერიაში გახრჯულ 32 005 ლიტრ საწვავზე, მერიამ ვერ წარმოადგინა შესაბამისი დოკუმენტური დასაბუთება, რომ ეს საწვავი სამსახურებრივი მოვალეობის შესრულებისთვის დაიხარჯა. აქედან, 28 435 ლიტრი გაცემულია ავტომანქანებზე, რომლებიც ეკუთვნოდათ მერიის თანამშრომლებს და არ იყო მერიის ბალანსზე, ხოლო 3 570 ლიტრი – მორიგე ავტომანქანაზე.

აუდიტის დასკვნის მიხედვით, ქალაქ ბათუმის მერიის ფინანსური აუდიტის ანგარიში მოიცავს ფინანსური მდგომარეობის შესახებ ანგარიშგებას 2016 წლის 31 დეკემბრის მდგომარეობით.

ანგარიშში აღნიშნულია, რომ მერია წლის განმავლობაში სარგებლობდა 42 ერთეული ისეთი ავტოსატრანსპორტო საშუალებით, რომელიც არ ირიცხება მუნიციპალიტეტის მერიის ბალანსზე და იმყოფებოდა მერიის საჯარო მოსამსახურეების პირად საკუთრებაში/მფლობელობაში.

„აღნიშნულ ავტოსატრანსპორტო საშუალებებზე გაცემულია 38 773 ლარის ღირებულების 28 435 ლიტრი საწვავი. მერიის მიერ ვერ იქნა წარმოდგენილი გაცემული საწვავის სამსახურებრივი მოვალეობების შესრულებისათვის ხარჯვის დოკუმენტური დადასტურება“, – აღნიშნულია ანგარიშში.

აუდიტი ასევე აცხადებს, რომ „მერის შესაბამისი ბრძანებით, საწვავის ლიმიტი განსაზღვრულია მორიგე ავტომანქანებზე. მოქმედი რეგულაციებით, სამორიგეო ავტომობილი წარმოადგენს ზოგადი სამსახურებრივი საჭიროებიდან გამომდინარე დაკისრებული სამსახურებრივი მოვალეობების შესასრულებლად განკუთვნილ ავტოსატრანსპორტო საშუალებას, რომელიც გამოიყოფა ყოველი კონკრეტული მოთხოვნის საფუძველზე დაწესებულების კონკრეტულ თანამშრომელზე. მორიგე ავტომობილებზე, მოწოდებული ინფორმაციით, სულ გახარჯულია 6 941 ლიტრი საწვავი, საიდანაც 3 570 ლიტრი საწვავის ხარჯვაზე ვერ იქნა წარმოდგენილი სამსახურებრივი დანიშნულებით ხარჯვის დამადასტურებელი დოკუმენტაცია“.

აუდიტი ასევე აცხადებს, რომ „მერიას არ აქვს დადგენილი შესაბამისი კრიტერიუმები, რომელიც განსაზღვრავს, თუ რომელ თანამშრომელს ესაჭიროება განპიროვნებული ავტომანქანა. აგრეთვე არ არის განსაზღვრული, რა საჭიროების გათვალისწინებით ხდება მერიის თანამშრომელთა პირად საკუთრებაში/მფლობელობაში არსებულ ავტოსატრანსპორტო საშუალებებზე საწვავის გამოყოფა/ლიმიტების დადგენა“.

აუდიტის რეკომენდაციაა, „მერიის ხელმძღვანელობამ საჭიროებების მაქსიმალური გათვალისწინებით, შეიმუშაოს ტრანსპორტის მოვლა-შენახვისა და ექსპლუატაციის ხარჯების ოპტიმიზაციის გეგმა, სადაც განისაზღვრება კრიტერიუმები, რომლის გათვალისწინებითაც განხორციელდება მერიის თანამშრომლისთვის განპიროვნებული ავტომანქანის გადაცემა, აგრეთვე პირად საკუთრებაში/ მფლობელობაში არსებულ ავტოსატრანსპორტო საშუალებებზე საწვავის გამოყოფა/ლიმიტების დადგენა“.

აუდიტის პერიოდისთვის მერიის ბალანსზე რიცხული ავტომანქანების რაოდენობა შეადგენდა 62 ერთეულს.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com