ბათუმის მერმა, ლაშა კომახიძემ, დღეს, 2 მარტს, მერიაში განხორციელებული რეორგანიზაციის შესახებ პრეზენტაციისას განაცხადა, რომ მერიას აჭარის ფინანსთა და ეკონომიკის სამინისტროსგან უკვე გადაეცა თანხმობის წერილი და 5 ჰექტარი ტერიტორია ჭოროხის სანაპიროზე. ამ ტერიტორიაზე მერია ბიზნესჰაბს გააკეთებს.
„აქ შევქმნით ჩემ მიერ წინასაარჩევნოდ დაანონსებულ ინდუსტრიულ ზონას და ათობით ახალ ბიზნესს მივცემთ საშუალებას, რომ წარმოების სფეროში დაიწყოს მუშაობა.
ასევე გეტყვით, რომ ყველა ის ადამიანი, ვისაც რეორგანიზაციის შემდეგ უწევს მერიის სამსახურებისა თუ აიპ-ების დატოვება, იქნება ამ ბიზნესებისთვის შეთავაზებული, კერძო სექტორში დასასაქმებლად,“ -ამბობს მერი.
„ბათუმელების“ კითხვაზე, თუ რა რაოდენობის თანხა სჭირდება ბიზნესჰაბის გაკეთებას, ლაშა კომახიძე ამბობს, რომ მოდელი უკვე შემუშავებულია, „დაახლოებით თვენახევრის განმავლობაში დამთავრდება პროექტი და სწორედ ამის შემდეგ იქნება ცნობილი, რამდენი დასჭირდება მის განხორციელებას“.
