ასოციაციამ – „ღირსეული სიბერე“ შესაძლოა მაისიდან მუშაობა შეაჩეროს. ეს არასამთავრობო ორგანიზაცია 2009 წლიდან დღემდე ევროკავშირის ფინანსური მხარდაჭერით ხანდაზმული ადამიანების უფლებების დაცვაზე, მათი სოციალური და ეკონომიკური კუთხით გაძლიერებაზე მუშაობს.
„თუკი მუნიციპალიტეტის მერია თანადაფინანსებას ვერ მოახერხებს, ორგანიზაცია მუშაობის გაგრძელებას ვეღარ შეძლებს. წელს ევროკავშირს ამ კუთხით კონკურსი არ გამოუცხადებია და შესაბამისად, დაფინანსება არ გვაქვს. მიმდინარე პროექტი მაისში სრულდება,“ – ამბობს „ღირსეული სიბერის“ ხელმძღვანელი, ნანა კალანდაძე.
დონორი ორგანიზაციების პოზიციაა, რომ მათ მიერ დაფინანსებულ პროექტში თანადაფინანსებით ადგილობრივი ხელისუფლება ჩაერთოს და პროექტს მხარი დაუჭიროს. ნანა კალანდაძის თქმით, ქობულეთის მუნიციპალიტეტმა მხოლოდ გიორგი რომანაძის გამგებლობის დროს მიიღო გარკვეული ტიპის თანადაფინანსება. „ღირსეული სიბერის“ წარმომადგენლები უკვე შეხვდნენ ქობულეთის ამჟამინდელ მერს, მირიან ქათამაძეს.
„შევხვდით, მაგრამ ჯერ უცნობია, განახორციელებს თუ არა თანადაფინანსებას ქობულეთის მერია. თანადაფინანსების შემთხვევაში, შესაძლებელი იქნება დონორი ორგანიზაციებისთვის სხვა ტიპის პროექტის შეთავაზება,“ – გვითხრა ნანა კალანდაძემ.
„გააჩნია, რის შესაძლებლობას მოგვცემს ბიუჯეტი, მუნიციპალიტეტს ამის ვალდებულება არ აქვს,“ – აღნიშნა ქობულეთის მერმა, მირიან ქათამაძემ „ბათუმელებთან“ საუბრის დროს. იგი ამბობს, რომ თანადაფინანსების სურვილი აქვს, მაგრამ ამ ეტაპზე გარკვეული არ არის, დამატებითი ფინანსური რესურსი ბიუჯეტში გაჩნდება თუ არა.
„ჩვენ ძალიან დიდ პატივს ვცემთ ამ ორგანიზაციას, მადლობასაც ვეუბნებით ბევრი სასარგებლო პროექტის განხორციელებისათვის… თანადაფინანსების საკითხთან დაკავშირებით, არ ვიცი, თავის დროზე იყო თუ არა ეს საკითხი სამართლებრივად გამყარებული [იგულისხმება პერიოდი, როცა არასამთავრობო ორგანიზაციამ მუნიციპალიტეტიდან დაფინანსება მიიღო]. ვადასტურებ, რომ თანადაფინანსების სურვილი ნამდვილად მაქვს, მაგრამ ეს დაკავშირებულია დამატებითი ფინანსური სახსრების მოძიებასთან. ეს შეიძლება განხორციელდეს კვარტლის ბოლოს,“ – გვითხრა მირიან ქათამაძემ.
ქობულეთის მუნიციპალიტეტის 2018 წლის ბიუჯეტი 27 949 700 ლარითაა განსაზღვრული. იმ ორგანიზაციებში, რომლებიც მუნიციპალიტეტის ბიუჯეტიდან ფინანსდებიან, 1377 ადამიანია დასაქმებული, რომელთა შრომის ანაზღაურებისთვის ანუ ხელფასებისთვის, 5 900 160 ლარია გათვალისწინებული.
