ძველ ბათუმში, ირაკლი აბაშიძის #3-ში, რომელიც კულტურული მემკვიდრეობის ძეგლია, დაახლოებით ერთი საათის წინ სამშენებლო მასალები შეიტანეს. ადგილზე მუშებმა „ბათუმელებს“ ვერ უპასუხეს კითხვაზე, გაცემულია თუ არა მშენებლობის ნებართვა: „მოვა მეპატრონე, ჩვენ არაფერი ვიცით“.
შენობა მე-19 საუკუნეშია აშენებული. ეს სახლი იმ კუთხითაცაა გამორჩეული, რომ სადარბაზო შემონახულია იმ სახით, როგორც ის მე-19 საუკუნეში მოუპირკეთებიათ.
ბათუმი, ირაკლი აბაშიძის #3
ფოტო: ცაგო კახაბერიძე
გაცემულია თუ არა ნებართვა სამუშაოების ჩასატარებლად? – ამ კითხვით „ბათუმელებმა“ აჭარის კულტურული მემკვიდრეობის სააგენტოს მონიტორინგის სამსახურს მიმართა. სამსახური რეაგირებისთვის ადგილზე გავიდა. მოგვიანებით პრესსამსახურმა მოგვაწოდა ინფორმაცია, რომ სამუშაოები უკანონოდ მიმდინარეობდა და შეჩერებულია.
ძეგლზე უკანონო სამუშაოები ისჯება კულტურული მემკვიდრეობის დაცვის შესახებ კანონით, ხოლო ძეგლზე განზრახ იმგვარი ზემოქმედება, რის გამოც ძეგლს ემუქრება გამოუსწორებელი დაზიანება ან განადგურება, გამოიწვევს პირის სისხლის სამართლებრივ პასუხისმგებლობას საქართველოს კანონმდებლობით დადგენილი წესით.
ბათუმი. ირაკლი აბაშიძის #3, კულტურული მემკვიდრეობის ძეგლის სადარბაზოს იატაკი
ფოტოზე ჩანს, რომ უკვე ნაწილობრივ მოშლილია აივნის მოაჯირი
