„საზოგადოებრივ მაუწყებელს“ ბათუმის სტუდიის აშენებას ორი კომპანია სთავაზობდა: შპს „ალიგატორი 1“ – 800 ათას 228 ლარად და შპს „გზამშენი“ – 800 ათას ლარად. „გზამშენს“, რომელიც პრეტენდენტთან შედარებით ნაკლებ თანხას ითხოვდა სამუშაოების შესრულებაში, საზმაუს სატენდერო კომისიამ დისკვალიფიკაცია მისცა. „ალიგატორი 1“-ს კი ხარჯთაღრიცხვა/დაზუსტებისთვის სამდღიანი ვადა განუსაზღვრა.
ამონარიდი საზმაუსგან „ალიგატორი 1“-სთვის გაგზავნილი წერილიდან / წყარო: შესყიდვების სააგენტოს ვებგვერდი
სამდღიანი ვადა გუშინ, 20 თებერვალს ამოიწურა. სახელმწიფო შესყიდვების ვებგვერდზე კომპანიას დამატებით დოკუმენტები არ აუტვირთია.
შპს „ალიგატორი 1“-ის დირექტორმა, ჯემალ გორგაძემ „ბათუმელებთან“ სატელეფონო საუბარში აღნიშნა, რომ კომპანია ტენდერში მონაწილეობის გაგრძელებას აღარ აპირებს: „დამატებითი დოკუმენტაცია არ აგვიტვირთია. იყო რაღაც ჩვენი მიზეზები და არ დაგვიზუსტებია – ამ ეტაპზე მხოლოდ ამ განცხადებით შემოვიფარგლები“.
კომპანია „გზამშენს“ „ბათუმელები“ ვერ დაუკავშირდა.
„საზოგადოებრივი მაუწყებლის“ ბათუმის სტუდიის სამშენებლო სამუშაოების შესყიდვაზე გამოცხადებულ ტენდერში წინადადებების მიღება მიმდინარე წლის 29 იანვარს დასრულდა. მაუწყებელს ბათუმის სტუდიის მშენებლობისთვის 1 მილიონ 284 ლარი აქვს გათვალისწინებული. სატენდერო პირობებით, სამუშაოები ტენდერში გამარჯვებულთან ხელშეკრულების გაფორმებიდან 185 დღეში უნდა დასრულებულიყო.
ვინაიდან ტენდერი ფაქტობრივად ჩაიშალა – სტუდიის მშენებლობაზე ხელახალი ტენდერი გამოცხადდება, თუ სამუშაოებს ტენდერის გარეშე შეისყიდიან, ამას „საზოგადოებრივი მაუწყებელი“ გადაწყვეტს.
საზოგადოებრივი მაუწყებელი ბათუმის სტუდიის მოსაწყობად ახალაშენებულ, 25-სართულიან საცხოვრებელ კორპუსზე 26-ე სართულს დააშენებს. ფართობში, რაზედაც ბათუმის სტუდიისთვის ერთი სართული უნდა დააშენოს, საზოგადოებრივმა მაუწყებელმა 88 596 აშშ დოლარი გადაიხადა. მაუწყებელი ამ თანხის ოდენობას არ ასაჯაროებდა. თუმცა „ბათუმელებმა“ მოახერხა ნასყიდობის ხელშეკრულების მოპოვება.
ბათუმში, ფიროსმანის ქუჩაზე, ახალაშენებულ მრავალსართულიან კორპუსში 492,2 კვ/მ ფართობის ტერასა [კორპუსის სხვენი] მაუწყებელმა ბათუმის სტუდიის მოსაწყობად გასული წლის აგვისტოში შეიძინა.
ბათუმი, ფიროსმანის 18-ში მდებარე კორპუსი, რომლის თავზე საზმაუს სტუდია უნდა აშენდეს / ფოტო: თედო ჯორბენაძე
