ოჯახში ძალადობას გამოძიება გურამ ბ.-ს ედავება. გამოძიების ვერსიით, მან გასული წლის 5 დეკემბერს, „ხელების მრავალჯერ დარტყმით, ცოლს მიაყენა ფიზიკური ტკივილი“. ბრალდებული წინასწარ პატიმრობაში არ იმყოფება.
„თავს დამნაშავედ ვცნობ,“ – მიმართა მოსამართლე ვიოლეტა ფორჩხიძეს ბრალდებულმა ბრალის გაცნობის შემდეგ.
მოსამართლემ განმარტა, რომ ბრალის დადასტურების შემთხვევაში, ბრალდებულს ერთ წლამდე თავისუფლების აღკვეთა ელოდება, ან საზოგადოებისთვის სასარგებლო შრომა 80-დან 150 საათამდე.
გურამ ბ. ნასამართლევი არ არის. ის სასამართლოს ორიათასლარიანი გირაოს სანაცვლოდ ჰყავს გათავისუფლებული.
საქმეში დევს ექსპერტიზის დასკვნა, რაც ქალისთვის ფიზიკური ზიანის მიყენებას ადასტურებს, თუმცა სასამართლო არ მოისმენს რომელიმე ექსპერტის ან თავად ნაცემი ქალის ჩვენებას. დაცვის მხარემ უდავოდ მიიჩნია ყველა მტკიცებულება, რაც პროკურატურამ წარმოადგინა. ასეთ დროს სასამართლო მხარეებისგან მხოლოდ შესავალ და დასკვნით სიტყვებს ისმენს, ბრალდებული კი, საბოლოო განაჩენს მოისმენს.
მხარეებს შორის ამ ეტაპზე საპროცესო შეთანხმება მიღწეული არ არის.
„სასჯელის რა სახე იქნება სამართლიანი?“- ეს კითხვა „ბათუმელებმა“ ბრალდებულს სხდომის დასრულების შემდეგ დაუსვა. მან გვითხრა, რომ დუმილის უფლებას ირჩევს.
მოკლე კომენტარით შემოიფარგლა ადვოკატი პაატა ბერიძეც: „ცოლი უკვე შეურიგდა… ისინი ისევ ერთად ცხოვრობენ“.
