მთავარი,სიახლეები

პარკირება – „ბათუმის ავტოტრანსპორტი“ 100 ათას 300 საჯარიმო ქვითარს ყიდულობს

20.02.2018 • 3529
პარკირება – „ბათუმის ავტოტრანსპორტი“ 100 ათას 300 საჯარიმო ქვითარს ყიდულობს

„ბათუმის ავტოტრანსპორტს“ ბათუმში პარკირების წესების დარღვევებზე ავტომანქანის მფლობელების დასაჯარიმებლად შესაბამისი საჯარიმო ქვითრების მარაგი ამ ეტაპისათვის არ გააჩნია. „ავტოტრანსპორტში“ აცხადებენ, რომ დარჩენილი აქვთ იმ რაოდენობის ქვითრები, რაც დაახლოებით ერთი კვირის განმავლობაში ეყოფათ და სამსახური ჩვეულ რიტმში აგრძელებს მუშაობას.

ორი სახეობის 100 ათას 300 ერთეული საჯარიმო ქვითრის ბეჭდვა-შესყიდვაზე „ბათუმის ავტოტრანსპორტს“ ტენდერი აქვს გამოცხადებული, სადაც წინადადებების მიღება 22 თებერვალს დასრულდება. სატენდერო თანხა 13 ათას 186 ლარია. ტენდერის დასრულებამდე კი „ავტოტრანსპორტი“ 10 ათასი საჯარიმო ქვითრის შესყიდვას ტენდერის გარეშე აპირებს, რათა შესაბამის სამსახურს მუშაობაში ხელი არ შეეშალოს.

შპს „ბათუმის ავტოტრანსპორტის“ 100 % წილის მფლობელი ბათუმის მერიაა. მერიაში მიმდინარე რეორგანიზაციის გამო და ბათუმის მერის 2018 წლის 23 იანვრის შესაბამისი ბრძანებით, ბათუმში სატრანსპორტო ინფრასტრუქტურის მოვლა-პატრონობა „ბათუმის ავტოტრანსპორტს“ დაევალა.

ბათუმის საკრებულოს 2018 წლის 15 თებერვლის დადგენილებით კი „ავტოტრანსპორტს“ ადმინისტრაციულ სამართალდარვევათა კოდექსის 125-ე მუხლის მე-8 ნაწილითა და 1253-ე მუხლით გათვალისწინებული საჯარიმო ქვითრების გამოწერის  უფლება  მიეცა. ადრე ამ ფუნქციას მერიის „სატრანსპორტო ინფრასტრუქტურის მართვის სააგენტო“ ასრულებდა.

ბათუმში პარკირების კუთხით სერიოზული პრობლემებია. არასაკმარისია ავტოსადგომები, პარკირების წესების დარღვევისთვის კი, ყოველდღიურად ქალაქში ასობით მძღოლს აჯარიმებენ.

მნიშვნელოვანი პრობლემაა ასევე, რომ მრავალბინიანი საცხოვრებელი სახლების მშენებლები ვალდებულნი არიან, საცხოვრებელი სახლის პროექტში ავტომანქანებისთვის პარკინგი გაითვალისწინონ, თუმცა სანებართვო დოკუმენტის მიღების შემდეგ მშენებლები შეთანხმებას ცვლიან, რის გამოც პარკინგის ტერიტორიას სხვა დატვირთვა ეძლევა.

ბათუმის მერი, ლაშა კომახიძე, არჩევნებამდე „ბათუმელებთან“ აცხადებდა, რომ ბათუმში პარკირების შენობების მოწყობას აპირებს.

ამავე თემაზე:

ქუჩები ბათუმში, სადაც პარკირება შესაძლოა აიკრძალოს

https://batumelebi.netgazeti.ge/slideshow/61313/

https://batumelebi.netgazeti.ge/weekly1/12647/

 

გადაბეჭდვის წესი


ასევე: