“დღეს საღამოს დაახლოებით 18:00 საათზე ინციდენტი მოხდა „ახალი ამბების“ გადამღებ ჯგუფსა და აჭარის სოფლის მეურნეობის სამინისტროს თანამშრომლებს შორის. ქედის მუნიციპალიტეტში ღვინის ქარხნის ეზოში კორესპონდენტს ლაშა ველიაძეს სიტყვიერი შეურაცხყოფა მას შემდეგ მიაყენეს, რაც ის აჭარის სოფლის მეურნეობის სამინისტროს საინფორმაციო-საკონსულტაციო დეპარტამენტის მთავარ სპეციალისტ კარლო კეკელიძეს ინტერვიუს უთანხმებდა, [ამიტომაც ინციდენტის ამსახველი ვიდეო-მასალა არ არსებობს] სწორედ ამ დროს მათთან მივიდა აჭარის სოფლის მეურნეობის სამინისტროს თანამშრომელი მირზა სუქნიშვილი, რომელმაც რეპორტიორს მიაყენა სიტყვიერი შეურაცხყოფა, ინციდენტის დროს ჟურნალისტს ასევე შეეხენ ფიზიკურად. ამ დროს შემთხვევის ადგილზე იმყოფებოდნენ აჭარის სოფლის მეურნეობის მინისტრის მოადგილეები როსტომ შერვაშიძე და ავთანდილ მესხიძე.”
საზოგადოებრივი მაუწყებლის აჭარის ტელევიზიისა და რადიო მიმართავს სამართალდამცავ ორგანოებს, შეისწავლონ ჟურნალისტური საქმიანობის სავარაუდო ხელის შეშლის ფაქტი.
აჭარის სოფლის მეურნეობის სამინისტროს პრესსამსახურის თანამშრომელმა “ბათუმელებს” უთხრა, რომ ტელევიზიის მიერ გავრცელებულ განცხადებაზე განმარტებას უწყების თანამშრომლები ხვალ გააკეთებენ.
“ბათუმელები” ჟურნალისტ ლაშა ველიაძის ინტერვიუს მოგვიანებით შემოგთავაზებთ.
