„ვითხოვთ, მრავალსართულიანი კორპუსების მშენებლობას“ – მიმართვა მთავრობას

ამ წუთებში ე.წ „ოცნების ქალაქში“ საპროტესტო აქცია მიმდინარეობს. აქ ამბობენ,  რომ აქციაში დაახლოებით ათასამდე ადამიანი მონაწილეობს. ისინი აჭარისა და საქართველოს მთავრობას მათი საცხოვრებელი პირობების გაუმჯობესებას და შექმნილ მდგომარეობაზე რეაგირებას სთხოვენ.

„ბათუმელები“ აქციის ერთ-ერთ მონაწილეს, მარინე ბერიძეს  ესაუბრა. მისი თქმით, აქციის მონაწილეები ყოფილი 25-ე და 53-ე ბატალიონის და კიდევ სხვა ადგილებში ლოკალურად ჩასახლებული ეკომიგრანტი და სოციალურად დაუცველი მოსახლეობისთვის საცხოვრებელი კორპუსების აშენებას ითხოვენ.

„ჩვენ უკვე წლებია ველოდებით ხელისუფლების ნაბიჯებს, მაგრამ ჩვენი მდგომარეობის გასაუმჯობესებლად არც ერთმა ხელისუფლებამ ნაბიჯი არ გადადგა. ახლა ვითხოვთ, რომ იმ ტერიტორიაზე, სადაც ეკომიგრანტები და სხვა სოციალურად დაუცველი ოჯახები ვართ ჩასახლებული, მთავრობამ მრავალსართულიანი კორპუსების მშენებლობა დაიწყოს და დაგვაკმაყოფილოს საცხოვრებელი ბინებით.

დღეს ჩვენ, აქციის მონაწილეები, ოფიციალურ წერილს ვუგზავნით ქვეყნის ხელისუფლებას, – პრემიერ-მინისტრს, პრეზიდენტს და ვითხოვთ ჩვენი მოთხოვნების დაკმაყოფილებას, წინააღმდეგ შემთხვევაში ფართომასშტაბიან აქციებს დავიწყებთ, ჩვენი უფლებების დასაცავად,“ -ამბობს მარინა ბერიძე.

ე.წ „ოცნების ქალაქში“ დაახლოებით 3 ათასი ოჯახია ჩასახლებული. სხვადასხვა ლოკაციაზე მთლიანობაში 5 ათასამდე ოჯახია, რომლებიც მათ მიერვე აშენებულ ხის ქოხებში ცხოვრობენ. ბევრმა მათგანმა ბეტონის სახლები აიშენა. ჩასახლებულ ტერიტორიაზე არ არსებობს ინფრასტრუქტურა, მოქალაქეებს კომპანიებისგან არ მიეწოდებათ წყალი, ხოლო ელექტროენერგიას საერთო მრიცხველიდან იღებენ.

აქციის მონაწილეები აანონსებენ მარტის თვიდან საპროტესტო აქციების გაგრძელებას აჭარის მთავრობის სახლის წინ.

„ოცნების ქალაქში“ მცხოვრები ოჯახები მრავალსართულიანი კორპუსების მშენებლობის დაწყებას მოითხოვენ.
ფოტო: როინ გუნდაძე

აქციის მონაწილეები მრავალსართულიანი კორპუსების მშენებლობის დაწყებას მოითხოვენ.
ფოტო: როინ გუნდაძე