ნეტგაზეთი • RU

არის თუ არა ბავშვთა უსაფრთხოება დაცული ახალ ბულვარში

 

სოციალურ ქსელში გავრცელდა ფოტო, რომელზეც პატარა ბავშვის დამწვარი ხელია ასახული. პირი, რომელმაც ინფორმაცია გაავრცელა სოფიალურ ქსელში, Batumi – ბათუმელების სახელით არის რეგისტრირებული. ის წერს, რომ  ბათუმის ახალ ბულვარში, სადაც პატარა ბავშვი ჰყავდა სასეირნოდ გაყვანილი, ატრაქციონებთან დამონტაჟებულმა განათებებმა პატარას ხელი დაწვა. 

 

 

ბათუმის ახალი ბულვარი

 

„ბავშვთა ატრაქციონებს, სადაც პლასტმასის თოჯინები დგას, ქვემოდან აქვს განათებები, რომელიც ძალიან ცხელია და ბავშვმა ხელი დაიწვა. შეიძლება მივმართოთ ბულვარის ადმინისტრაციას ან ზედამხედველობის სამსახურს, რომ გააკეთონ დამცავი,“- წერს მშობელი.

 

„ბათუმელები“ ბულვარის ადმინისტრაციას დაუკავშირდა და მომხდართან დაკავშირებით შემდეგი კომენტარი მიიღო:

 

„ფაქტი ნამდვილად მოხდა, მაგრამ ეს განათებები დამონტაჟებულია არა საბავშვო ატრაქციონებზე, არამედ პალმის ძირებში. ამიტომ მშობლებმა უნდა მიაქციონ პატარებს ყურადღება, რადგან, როგორც ჩანს, ბავშვი პალმის ძირებთან მივიდა და იქ დაადო ხელი,“- ამბობს „ბათუმის ბულვარის“ ხელმძღვანელი გიორგი ზირაქაშვილი.

 

ბულვარის ადმინისტრაციის ხელმძღვანელი ამბობს, რომ   ბულვარში  განათებებს ვერ გამოცვლიან.

 

„ცივი განათება რომ გააკეთო, მაშინ ერთ ფერში უნდა გაანათო ბულვარი, სხვადასახვა ფერს კი თავისი ეფექტი აქვს. ეს არის ღამის ნათება და ამას ვერ შევცლით. ამიტომ მშობლებმა მეტი ყურადღება უნდა გამოიჩინონ, რომ ბავშვები ღამის განათებებთან არ მივიდნენ“.

 

ბულვარის ადმინისტრაციის განცხადებით, ბავშვთა კუთხესთან მინიშნებები დაიდგმება.       

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე