დავით გაბაიძე: აქამდე ნადირობის უფლება გვქონდა, მაგრამ ტყე ჩვენ არ გვეკუთვნოდა

საკონსტიტუციო ცვლილებებზე საჯარო განხილვა ბათუმის შოთა რუსთაველის სახელმწიფო უნივერსიტეტში მიმდინარეობს. უმაღლესი საბჭოს დეპუტატები აკადემიურ პერსონალსა და სტუდენტებს აცნობენ აჭარის კონსტიტუციის ახალ პროექტს.

„უნივერსალური უფლებამოსილების პრინციპს“ გაუსვა ხაზი თავის გამოსვლაში დავით გაბაიძემ, უმაღლესი საბჭოს თავმჯდომარემ. მისი თქმით, აჭარის ავტონომიურ რესპუბლიკას ექნება ყველა ის უფლებამოსილება, რაც არ არის ცენტრალური ან ადგილობრივი ხელისუფლების კომპეტენცია. საკონსტიტუციო ცვლილებების პროექტი არ ითვალისწინებს რომელიმე კონკრეტული უფლებამოსილების დელეგირებას, რაც უკვე გახდა კონსტიტუციონალისტების გარკვეული ნაწილის კრიტიკის საგანი.

„აუცილებელი არაა, რომ რომელიმე კომპეტენცია მოვპაროთ მუნიციპალიტეტს,“ – თქვა დავით გაბაიძემ. ადგილობრივი გზები, გამოფენები, ბაზრობები, ბიბლიოთეკები და მუზეუმები აჭარის ავტონომიური რესპუბლიკის უფლებამოსილებების ჩამონათვალში აღარ წერია.

დავით გაბაიძემ სცადა დასაბუთება, რატომ არ უნდა იყოს აჭარის ავტონომიური რესპუბლიკის განსაკუთრებულ უფლებამოსილებას მიკუთვნებული განათლება, კულტურა, სპორტი და ტურიზმი. ამ კუთხით აქამდე ცალკე კანონმდებლობა უმაღლეს საბჭოს არ მიუღია. „მხოლოდ ტურიზმის კუთხით არსებობს ერთი კანონი, მაგრამ ამის შესახებ მხოლოდ ტურიზმის დეპარტამენტში იციან,“ – დასძინა დავით გაბაიძემ.

უმაღლესი საბჭოს თავმჯდომარე მნიშვნელოვან წინსვლად მიიჩნევს იმას, რომ საკონსტიტუციო ცვლილების მიღების შემდეგ მიწა, წყალი და ხე შეიძლება აჭარას საკუთრებაში ჰქონდეს.

„აქამდე კომიკური სიტუაცია გვქონდა: ნადირობის უფლება გვქონდა, მაგრამ ტყე ჩვენ არ გვეკუთვნოდა…“

უმაღლესი საბჭოს თავმჯდომარემ პოლიტიკური ოპოზიციაც გააკრიტიკა: „სრულყოფილი არ არისო, ასე გვითხრეს. სრულყოფილი რომ ყოფილიყო, მაშინ ეს საჯარო განხილვებიც დაკარგავდა აზრს,“ – თქვა დავით გაბაიძემ.

კონსტიტუციური ცვლილებების საჯარო განხილვები კანონის მოთხოვნაა.

მოსაზრებებს ამ ეტაპზე სხვა დეპუტატები გამოხატავენ, რის შემდეგაც ისინი დასმულ შეკითხვებს უპასუხებენ.