კვირის ამბები,მთავარი,სიახლეები

ფოთის პორტში ახალი, ღრმაწყლოვანი ტერმინალი აშენდება

29.01.2018 • 9469
ფოთის პორტში ახალი, ღრმაწყლოვანი ტერმინალი აშენდება

ფოთის პორტში ნაყარი ტვირთების ახალი, ღრმაწყლოვანი ტერმინალის აშენებისთვის 100 მილიონ აშშ დოლარზე მეტი დაიხარჯება. „ეიპიემ ტერმინალს ფოთს“ (APM Terminals Poti) და „ფოთის ახალი ტერმინალების კონსორციუმს“ (PNTC) შორის ურთიერთგაგების მემორანდუმს ხელი 12 იანვარს მოეწერა.

თავად ახალი სუბიექტი – „ფოთის ახალი ტერმინალების კონსორციუმი“ საჯარო რეესტრის ეროვნულ სააგენტოში, ოდნავ მოგვიანებით, 2018 წლის 25 იანვარს დარეგისტრირდა.

ახალი ტერმინალის აშენება „ეიპიემ ტერმინალს ფოთის“ კუთვნილ ტერიტორიაზეა დაგეგმილი. უფრო კონკრეტულად, ფოთის პორტი გაფართოვდება ე.წ. „ჩრდილოეთ ტერიტორიის“ ფარგლებში და მოიცავს ახალ მოლოს, მშრალი ნაყარი ტვირთების საერთაშორისო სტანდარტების ტერმინალებისა და მასთან დაკავშირებული ინფრასტრუქტურის მშენებლობას.

ახალ ტერმინალს წლიურად, მინიმუმ, 1,5 მილიონი ტონა მშრალი ნაყარი ტვირთის გადამუშავება შეეძლება.

რამდენიმე დღის წინ დაფუძნებული სააქციო საზოგადოება „ფოთის ახალი ტერმინალების კონსორციუმის“ დამფუძნებლები არიან საქართველოს მოქალაქე თამაზ ჩხიკვიშვილი (55%), იტალიის მოქალაქე ჯან კარლო სპირიტო (25 %), საფრანგეთის მოქალაქე სტანისლავ კრასლავსკი (15 %) და ჩეხეთის რესპუბლიკის მოქალაქე ლადისლავ ჰალაჩკა (5%).

„კონსორციუმში გაერთიანებულნი არიან უცხოელი ბიზნესმენები და კომპანიები. ჩვენ ვიყავით პირველები 1996 წელს, როცა დავაფუძნეთ პირველი სტივიდორული კომპანია და საქართველოში პირველად შევქმენით პრეცედენტი ტერმინალების კერძო მართვისა. ლოგიკურია, რომ  ჩვენ ვიტვირთეთ ეს მისიაც, პირველად ფოთის პორტში ავაშენოთ პირველი თანამედროვე ღრმაწყლოვანი ტერმინალი,“ – ეს განცხადება “ფოთის ახალი ტერმინალების კონსორციუმის” თავმჯდომარე თამაზ ჩხიკვიშვილმა 12 იანვარს, მემორანდუმის გაფორმებისას გააკეთა.

მისივე თქმით, ახალი თანამედროვე ნაყარი ტვირთების ტერმინალის მშენებლობა მნიშვნელოვნად შეუწყობს ხელს ქვეყნის ტრანზიტული კორიდორის კონკურენტუნარიანობის გაზრდას,  დამატებითი ტვირთების მოზიდვას საქართველოს რკინიგზაზე, დაასაქმებს ფოთის მოსახლეობას და მოიზიდავს უცხოურ ინვესტიციებს ქვეყანაში.

ჩხიკვიშვილის თქმით, კონსორციუმი ახალი ნაყარი ტვირთების ტერმინალის აშენებას მხოლოდ კერძო ინვესტიციებით გეგმავს: „პროექტი არ საჭიროებს სახელწიფო სუფსიდიებს და ფინანსურ დახმარებას. ამასთან, ეს პროექტი არ ზღუდავს არავის, რომ განავითაროს ანალოგიური ტერმინალები“.

ფოთის პორტი არ იქნება ერთადერთი ღრმაწყლოვანი პორტი საქართველოში. 2017 წლის 20 დეკემბერს ანაკლიის ღრმაწყლოვანი პორტის მშენებლობას ჩაეყარა საფუძველი. აღსანიშნავია, რომ გასული წლის დეკემბერში “ეიპიემ ტერმინალს ფოთის” გენერალური დირექტორი კლაუს ჰოლმ ლოურსენი ვერ ხედავდა ღრმაწყლოვანი პორტის საჭიროებას.

“დღეს არ დგას ღრმაწყლოვანი პორტისთვის დამახასიათებელი დიდი ტვირთების მიღების საჭიროება. ახალ აბრეშუმის გზას თუ შევხედავთ, მსოფლიოს ამ ნაწილში ის ჭრის შავ ზღვას ბულგარეთისკენ, რუმინეთისა ან უკრაინისკენ. დიდი ხომალდები არ აირჩევენ თავის მარშრუტად შავ ზღვას, ეს აზრს მოკლებულია”, – თქვა მან “TV პირველთან” ინტერვიუში.

კიდევ ერთი ღრმაწყლოვანი პორტს ანაკლიაში შენდება.

ფოტოზე: კლაუს ჰოლმ ლოურსენი, “ეიპიემ ტერმინალ ფოთის”გენერალური დირექტორი და ფოთის ახალი ტერმინალების კონსორციუმის თავმჯდომარე თამაზ ჩხიკვიშვილი

გადაბეჭდვის წესი


ასევე: