სწორედ აღნიშნული ინიციატივიდან გამომდინარე, ეტაპობრივად დაიწყო პროგრამის განხორციელება. 2015 წლის 29 ივნისიდან კახეთში, მცხეთა-მთიანეთში, შიდა ქართლში, აჭარაში, გურიასა და სამეგრელო-ზემო სვანეთში გაიხსნა პროექტის რეგიონული ოფისები, სადაც ნებისმიერ მოქალაქეს შეუძლია ამომწურავი ინფორმაცია მიიღოს როგორც პროექტის, ასევე მასში მონაწილეობისა და პირობების შესახებ.
დაინტერესებულ მოქალაქეებს 29 ივნისიდან 3 აგვისტომდე ეძლევათ საშუალება, მონაწილეობა მიიღონ ბიზნესიდეის კონკურსში. მიკრო და მცირე მეწარმეთა იდეების განსახორციელებლად თანადაფინანსება გაიცემა: ერთ მეწარმეზე – 5000 ლარი, ორ მეწარმეზე – 10 000 ლარი, ხოლო სამ მეწარმეზე 15 000 ლარის ოდენობით, ბენეფიციარისთვის გადაცემული თანხის 20%-იანი თანამონაწილეობით.
პროგრამის ძირითადი დანიშნულებაა წაახალისოს რეგიონში ახალი ბიზნესის წამოწყება, დანერგოს სიახლეები და ხელი შეუწყოს უკვე არსებული მიკრო და მცირე ბიზნესის განვითარებას. გარდა ფინანსური მხარდაჭერის მექანიზმისა, პროგრამა ასევე ითვალისწინებს საკონსულტაციო მომსახურების გაწევას, ტრენინგ/სემინარებისა და გადამზადების კურსების მეშვეობით, რათა რეგიონის მოსახლეობამ მიიღოს მაქსიმალურად სრულყოფილი ინფორმაცია ბიზნესის ეფექტურად მართვასთან დაკავშირებულ საკითხებზე და შემდგომში მოახდინონ მიღებული ინფორმაციის პრაქტიკაში განხორციელება. რაც თავის მხრივ, რეგიონის წინსვლისთვის მნიშვნელოვან ფაქტორს წარმოადგენს. კონკრეტულად, პროექტის ფარგლებში, დაინტერესებულ პირებს შესაძლებლობა ეძლევათ:
1. წარადგინონ საკუთარი ბიზნესიდეა
2. გაიღრმავონ ბიზნესუნარები
3. გამოიყენონ შესაძლებლობა და მიიღონ შესაბამისი თანადაფინანსება
განაცხადების შევსება მიმდინარეობს ონლაინრეჟიმში, მისამართზე: www.qartuli.ge და მისი შევსება შეუძლიათ თვრამეტ წელს მიღწეულ საქართველოს მოქალაქეებს.
პროგრამის განსახორციელებლად ცენტრალური ბიუჯეტიდან გამოიყო 20 000 000 ლარი, ფინანსური მხარდაჭერის ხანგრძლივობის ვადად კი 26 თვე განისაზღვრა. აჭარის, გურიისა და ზემო სვანეთის რეგიონში პროექტს ახორციელებს „შპს ჯი-ემ-სი-ჯი“.
დამატებითი ინფორმაციის მისაღებად აჭარის, გურიისა და ზემო სვანეთის რეგიონით დაინტერესებულ მოქალაქეებს შეუძლიათ დარეკონ ცხელ ხაზზე: 16100, ორშაბათიდან პარასკევის ჩათვლით, 09:00-18:00 საათამდე , ან ეწვიონ სპეციალურად ამ რეგიონებში მცხოვრები მოქალაქეებისათვის გახსნილ რეგიონულ ოფისცენტრებს შემდეგ მისამართებზე:
ბათუმი: ა.მელაშვილის ქ.#2;
ზუგდიდი, ლაზის ქ. #14;
ლანჩხუთი, ჟორდანიას ქ. #114.
მოქალაქეს, რომელიც გადაწყვეტს პროექტში მონაწილეობას, მოუწევს გაიაროს რამდენიმე ეტაპი:
1. მონაწილეობა ბიზნესიდეების კონკურსში;
2. ბიზნესგეგმის შედგენის უფასო ტრენინგის გავლა;
3. მონაწილეობა ბიზნესგეგმის კონკურსში.
განვითარებული რეგიონი ძლიერი ქვეყნის გარანტია!
www.qartuli.ge
