კონფერენცია ეძღვნება „აღმოსავლეთ პარტნიორობის” რიგის სამიტის შედეგების, ევროკავშირთან ასოცირების შესახებ შეთანხმების და მისი ნაწილის, ღრმა და ყოვლისმომცველი თავისუფალი სავაჭრო სივრცის კომპონენტის განხორციელების საკითხების განხილვას. რეგიონში არსებული გეოპოლიტიკური ვითარების გათვალისწინებით მნიშვნელოვანი ყურადღება დაეთმობა ევროკავშირის აღმოსავლეთ სამეზობლოში უსაფრთხოების გამოწვევებს.
კონფერენციაში მონაწილეობენ საქართველოსა და ევროკავშირის წევრი ქვეყნების, ევროკავშირის ინსტიტუტებისა და პარტნიორი ქვეყნების მაღალი რანგის ოფიციალური პირები, სამოქალაქო საზოგადოებისა და ბიზნეს სექტორის წარმომადგენლები.
კონფერენციის ფარგლებში იმუშავებს ექვსი თემატური სესია: რიგის სამიტის შემდეგ – „აღმოსავლეთ პარტნიორობის“ ფარგლებში შემდგომი თანამშრომლობის განვითარების პერსპექტივები; აღმოსავლეთ ევროპაში უსაფრთხოებისა და სტაბილურობის განმტკიცების შესაძლებლობები „ჩეთემ ჰაუს“-ის ფორმატი; თანამშრომლობა V4-სა (სლოვაკეთის რესპუბლიკა, უნგრეთი, ჩეხეთის რესპუბლიკა, პოლონეთის რესპუბლიკა) და „აღმოსავლეთ პარტნიორობის“ ქვეყნებს შორის; საქართველო–ევროკავშირის ასოცირების შესახებ შეთანხმებით გათვალისწინებული რეფორმების განხორციელება – გამოცდილებისა და საუკეთესო პრაქტიკის გაზიარება; ღრმა და ყოვლისმომცველი თავისუფალი სავაჭრო სივრცე (DCFTA); ევროკავშირის საკითხებზე სტრატეგიული კომუნიკაცია და თანამშრომლობა სამოქალაქო საზოგადოებასთან.
