ბათუმი-ახალციხის ცენტრალური საავტომობილო გზის ხულოსა და შუახევის მონაკვეთზე ავტომობილების სანომრე ნიშნის ამომცნობი ვიდეოთვალები დამონტაჟდება. ე.წ. „ჭკვიანი კამერების“ შეძენა-მონტაჟისა და ერთიან ქსელში ჩასართავად საჭირო მომსახურება ხულოსა და შუახევის გამგეობებმა გამარტივებული წესით შეისყიდეს, ხელშეკრულება კი შპს „დელტა კონსალტინგთან“ გააფორმეს.
შუახევის გამგეობის შესყიდვების სამსახურის უფროსის, ომარ აბუსელიძის ინფორმაციით, შუახევის მუნიციპალიტეტში სულ ექვსი ვიდეოთვალი განთავსდება. ვიდეოთვალების შეძენა-მონტაჟისა და ერთიან ქსელში ჩასართავად მუნიციპალური ბიუჯეტიდან 21 570 ლარია გამოყოფილი. რაც შეეხება ლოკაციებს, თუ სად განთავსდება ანალიტიკურ-პროგრამულ უზრუნველყოფასთან თავსებადი ვიდეოთვალები, გამგეობის ინფორმაციით, შსს-ს ანალიტიკური ცენტრი განსაზღვრავს.
რაც შეეხება ხულოს მუნიციპალიტეტს, აქ სამი ვიდეოთვალი დამონტაჟდება, შეძენა-მონტაჟსა და ინსტალაციაზე კი ხელშეკლრულება 10 785 ლარზეა გაფორმებული.
ხულოს გამგეობის ინფრასტრუქტურის სამსახურის უფროსის, ზაზა აბულაძის ინფორმაციით, ამ დროისთვის ვიდეოთვალები შეძენილია, უახლოეს დღეებში კი მათი დამონტაჟება დაიწყება. რაც შეეხება ზუსტ ლოკაციებს, შუახევის მსგავსად, აქაც შსს განსაზღვრავს.
შსს-მ შეარჩია „ჭკვიანი კამერების“ ლოკაციები ქედაშიც. ბათუმი-ახალციხის ცენტრალური საავტომობილო გზის ქედის მონაკვეთზე განთავსებული 17 ვიდეოთვალიდან ათი დაბაშია დამონტაჟებული, ორი – ბათუმი-ახალციხის საავტომობილო გზის ქედა-ხელვაჩაურის საზღვარზე, ორი – მახუნცეთის სკოლასთან, სამი – ქვედა მახუნცეთში, სადაც ვიდეოთვალები ცენტრალურ გზაზე, ჩანჩქერთან და თამარის ხიდთანაა განთავსებული, იმ ტერიტორიებზე, სადაც ტურისტები ხშირად გადაადგილდებიან.
