ბათუმი – ახალციხის ცენტრალური საავტომობილო გზის ქედის მონაკვეთზე ქედის გამგეობის მიერ რამდენიმე თვის წინ დამონტაჟებულ ვიდეოსათვალთვალო კამერებს ქსელში რთავენ. კამერების ქსელში ჩართვას ტენდერში გამარჯვებული კომპანია „გლობალ ტექნოლოჯი გრუპი“ ახორციელებს.
17 კამერის სისტემის ჩამწერ მოწყობილობასთან დასაკავშირებლად და ქსელში ჩასართავად ქედის გამგეობას სულ 28 000 ლარი ჰქონდა გამოყოფილი. ელექტრონულ ტენდერში გამარჯვებულ კომპანიასთან ხელშეკრულება კი ტენდერის სავარაუდო ფასზე – 28 000 ლარზეა გაფორმებული.
ქედის მუნიციპალიტეტის დაბებსა თუ ბათუმი – ახალციხის ცენტრალური საავტომობილო გზის ქედის მონაკვეთზე განთავსებული 17 ვიდეოთვალიდან ათი დაბაშია დამონტაჟებული, ორი – ბათუმი-ახალციხის საავტომობილო გზის ქედა-ხელვაჩაურის საზღვარზე, ორი – მახუნცეთის სკოლასთან, სამი – ქვედა მახუნცეთში, სადაც ვიდეოთვალები ცენტრალურ გზაზე, ჩანჩქერთან და თამარის ხიდთანაა განთავსებული, იმ ტერიტორიებზე, სადაც ტურისტები ხშირად გადაადგილდებიან.
ვიდეოთვალების დასაყენებლად ადგილები ქედაში შსს-მ შეარჩია.
