მასწავლებელი მანანა [მიკო] მიქავა, ზუგდიდის სასამართლომ ფეიერვერკის სროლისთვის 5 000 ლარით დააჯარიმა.
მანანა მიქავამ თავის ახსნა-განმარტებაში დაწერა, რომ ის არ აღიარებს არალეგიტიმურ ხელისუფლებას და მის მიერ მიღებულ კანონებს.
„მოგესალმებით ცირკ „შაპიტოს“ მონაწილე პირებს, ქალბატონ მოსამართლესა და საპატრულო პოლიციის წარმომადგენლებს.
მოგახსენებთ, რომ პირველ რიგში, არ ვაღიარებ არალეგიტიმური მთავრობის მიერ დასმული არალეგიტიმური პრეზიდენტის მიერ ხელმოწერილ კანონებს. ასევე, მინდა მოგახსენოთ, რომ 16 იანვარს მე არ ვიმყოფებოდი აქციაზე, პოლიციის სამმართველოსთან მივედი, რათა სამართალდამცავებისთვის ფეიერვერკით მიმელოცა ახალი წელი.
არც ერთი ივენთითა თუ ატრიბუტიკით არ დასტურდება სამმართველოს მიმდებარედ აქცია, ხოლო რამდენიმე ადამიანის თავშეყრას თუ უკვე აქციად აღიქვამთ, იგივე ქმედებისთვის ბაზარსა და კონცერტზეც უნდა დააჯარიმოთ მოქალაქეები პიროტექნიკის გასროლისთვის.
მინდა მოგახსენოთ, რომ მე ვარ ქართული ენისა და ლიტერატურის მასწავლებელი, რომელიც მოსწავლეებს ასწავლის ვაჟას, ილიას, ალუდამ მუცალს მარჯვენა არ მოაჭრა და არ დაემორჩილა თემის დადგენილ კანონებს, რადგან ის იყო კანიბალური და მიუღებელი! ასევეა ჩემთვის მიუღებელი ყაველაშვილის ხელმოწერილი კანონები და თუ აქციაზეც მომეხალისება ფეიერვერკი, აუცილებლად გავისვრი!
თქვენ მე დღეს სამშობლოს სიყვარულისთვის თუ დამაჯარიმებთ 5000 ლარით ან მომისჯით პატიმრობას, ეს ჩემთვის დიდი პატივია. „პატივისცემის ღირსია ყველა, ვისაც სამშობლო შერჩა და უყვარს! ვისაც სამშობლო უყვარს და ცდილობს აღარ დაადგას ქედზე უღელი!”
მონა-მოსამართლემ გვანცა ვარდოსანიძემ დამნაშავედ მცნო ადმინისტრაციული სამართალდარღვევის ნაწილში და დამაჯარიმა 5000 ლარით, მიუხედავად იმისა, რომ ვერ დაადასტურა ჩემი აქციაზე ყოფნა.
მონა-მოსამართლემ დარბაზში ღიმილის უფლებაც აღგვიკვეთა და გაძევებით დაგვემუქრა! ასე ეშინიათ რეჟიმის მონებს სილაღისა და თავისუფლების“-ასეთი ახსნა-განმარტება დაუწერა მანანა მიქავამ პოლიციას.
16 იანვარს ზუგდიდში ფეიერვერკის გაშვების გამო დააკავეს არტისტი და სამოქალაქო აქტივისტი კერენ ესებუა და მარიამ სიჭინავა, „დროას“ ადგილობრივი ორგანიზაციის ხელმძღვანელი.
აქტივისტების დროებითი დაკავების იზოლატორში გადაყვანას ზუგდიდის რაიონული სასამართლოს შენობასთან ხმაური მოჰყვა. შენობასთან დაკავებულების მხარდასაჭერად, სოლიდარობის ნიშნად მოქალაქეები მივიდნენ. ზუგდიდის პოლიციის შენობასთან მივიდა მასწავლებელი მანანა მანანა [მიკო] მიქავაც. მან პიროტექნიკა აუშვა. ფეიერვერკის აშვებიდან რამდენიმე წუთში დააკავეს მიკო მიქავაც. დაკავებიდან მოკლე ხანში იგი ხელწერილით გაათავისუფლეს.
ამავე თემაზე:
