Batumelebi | ჩასახლებულთა აქცია ბათუმის მერიის წინ ჩასახლებულთა აქცია ბათუმის მერიის წინ – Batumelebi
RU | GE  

ჩასახლებულთა აქცია ბათუმის მერიის წინ

 

 

ამ წუთებში ბათუმის მერიის წინ, ხელვაჩაურის ტერიტორიაზე თვითნებურად ჩასახლებული მოსახლეობა საპროტესტო აქციას მართავს. მოსახლეობა ყოფილი ბატალიონის ტერიტორიაზე მათ მიერ ჩადგმული საცხოვრებელი ქოხების დანგრებას აპროტესტებს. ისინი პროცესის შეჩერებას და ქალაქის ხელმძღვანელობასთან შეხვედრას ითხოვენ.   აქციის მონაწილეები აცხადებენ, რომ თუ ხელმძღვანელობა არ შეხვდებათ, მერიის შენობაში შეიჭრებიან.  

 

„რაც ცარიელი ქოხები იყო, ყველა დაშალეს, ჩვენც გვეუბნებიან, უნდა წახვიდეთო. ხულოდან ვარ, მაგრამ აქ ქირით ვცხოვრობდი. ხულოს გამგებელიც მოვიდა და კომისია შეიწავლის ვითარებასო. ჩვენ ვითხოვთ ადგილზე მოხდეს შესწავლა“ – ამბობს აქციის მონაწილე  ხათუნა აბაშიძე.

„მეც ხულოდან ვარ. მეწყერსაშიშ ზონაში ვცხოვრობთ ექვსი სული. მოვითხოვთ რომ ხელისუფლებამ შეწყვიტოს ქოხების დანგრევა“- ამბობს გუგული შაინიძე.

აქციის მონაწილეები ამბობენ, რომ მათ ქოხების დასანგრევად მისულმა მერიის წარმომადგენლებმა შეურაცხყოფა რელიგიური ნიშნით მიაყენეს: „თურქების ქოხებს ვანგრევთო, ტელეფონზე უთხრეს ვიღაცას“. 

ერთ-ერთმა გამომსვლელმა აქცენტი ამ ფაქტზეც გააკეთა: „ჩვენ არ გვრცხვენია რომ ვართ მუსულმანი მოსახლეობა, ამიტომ თქვენი დემოკრატია და სიტყვის თავისუფლება არის მოჩვენებითი, რადგან მობრძანდებიან და ამბობენ, თათრები ხართო. ვინ არიან თათრები? თათრები სწორედ ხელისუფლების ხელშეწყობით დასახლდნენ ბათუმში და ჩვენც რატომ უნდა შევნატროდეთ მათ.“

აქციაში მონაწილე მოსახლეობა ამბობს, რომ ქოხებში სადაც ამჟამად ცხოვრობენ გაუსაძლისი მდგომარეობა აქვთ: „არ გვაქვს შუქი, წყალი და ელემენტარული პირობები. არც ჩვენ გვიხარია იქ ცხოვრება, მაგრამ რა ვქნათ. ამიტომ დროულად გადაწყვიტოს ხელისუფლებამ ჩვენი საკითხი“.

თვითნებურად ჩასახლებული მოსახლეობის 350 ქოხი მერიის წარმომადგენლებმა უკვე დაანგრიეს და ტერიტორიის გაწმენდითი სამუშაოებისთვის ბიუჯეტიდან თანხაც გამოიყო.

აჭარის მთავრობის აპარატის სოციალურ-ეკონომიკური მდგომარეობის ანალიზის დეპარტამენტის უფროსმა კობა ჩხეიძემ გასულ კვირას “ბათუმელებთან” განაცხადა, რომ „მთავრობის გადაწყვეტილებით,  ვისაც რეალურად აქვს საცხოვრებელი ადგილის პრობლემა, შეუძლიათ ჯერჯერობით ქოხებში დარჩნენ და იცხოვრონ: „რა გადაწყვეტილება იქნება მიღებული საბოლოოდ, ამაზე კომენტარს ჯერ არ ვაკეთებთ, რადგან არ გვინდა წინასწარი მოლოდინები გაჩნდეს.“ 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე