მიმართვა ირაკლი ჩავლეიშვილსა და რეგიონული განვითარების სამინისტროს



„მიკვირს, რომ რატომ დუმს საკრებულოს თავმჯდომარე, როდესაც საქართველოს რეგიონული განვითარების სამინისტროს განცხადებაში, საქართველოს მასშტაბით პროექტების დაფინანსების შესახებ, აჭარიდან არც ერთი პროექტი არ მოჰყოლია, არც ერთი კაპიკი არ არის გამოყოფილი აჭარის რეგიონზე“, – ეს განცხადება ბათუმის საკრებულოს თავმჯდომარის მოადგილემ ჯუმბერ კახიძემ გააკეთა. 



ჯუმბერ კახიძე, რეგიონული განვითარების სამინისტროს გადაწყვეტილებას, აჭარაში არც ერთი პროექტი არ დაფინანსდეს, „ხელისუფლების უუნარობის კიდევ ერთ გამოვლინებას“ უწოდებს, რომელიც მისი თქმით, ბათუმის განვითარებას შეაჩერებს.

„საქმე ეხება ბათუმის დინამიური განვითარების არა მხოლოდ შენელებას, არამედ პრაქტიკულად მის შეწყვეტას. წინა გამოსვლებში მე დავასახელე რამდენიმე პროექტი, რომელიც არ დაფინანსდა, ამას დაემატა რამდენიმე პროექტი, რომელიც გაგვიცხადა საკრებულოს თავმჯდომარემ. მე მიკვირს, რატომ დუმს საკრებულოს თავმჯდომარე, როდესაც გამოქვეყნდა რეგიონული განვითარების სამინისტროს განცხადება, სხვადასხვა პროექტის დაფინანსებაზე და მასში აჭარიდან არც ერთი პროექტი არ მოჰყოლია, არც ერთი კაპიკი არ არის გამოყოფილი, აჭარის არც ერთ რაიონზე“, – აღნიშნა ჟუმბერ კახიძემ.

მისივე თქმით, ეს საკითხები, არამარტო რეგიონის განვითრებას, არამედ მისი მოსახლეობის ყოფაცხოვრებას უკავშირდება, რადგან პროექტების შეჩერებით 7000 სამუშაო ადგილი გაუქმდა.

„ჩვენ თურმე არამარტო სხვა დიდი პროექტების, არამედ იმ პროექტის დაფინანსების პრობლემაც გვქონია, რასაც ჟირინის არხი ეწოდება. მე ვთვლი, რომ ბათუმის განვითრებას დიდი პრობლემა ექმნება“,- განმარტა ჯუმბერ კახიძემ.

მისივე ინფორმაციით, ასევე შეჩერდა სტადიონის, ხიდების მშენებლობა თუ ნაპირგამაგრების სამუშაოები.

სამინისტრომ, 2013 წლის პირველი კვარტლის შემაჯამებელი დოკუმენტი გამოაქვეყნა, რომლის მიხედვით რეგიონებში განსახორციელებელი პროექტების ფონდიდან 643 პროექტი დაფინანსდება. ამ პროექტებში
200 მილიონ ლარამდე დაიხარჯება. აღნიშნული დოკუმენტის მიხედვით, აჭარაში არც ერთი პროექტი არ ფინანსდება.

ნეტგაზეთის მასალების სხვა გამოცემებში გადაბეჭდვის წესი
თამარ ჯაყელი