Batumelebi | ჟურნალისტი აჭარის უმაღლესი საბჭოს თავმჯდომარის წინააღმდეგ ჟურნალისტი აჭარის უმაღლესი საბჭოს თავმჯდომარის წინააღმდეგ – Batumelebi
RU | GE  

ჟურნალისტი აჭარის უმაღლესი საბჭოს თავმჯდომარის წინააღმდეგ

მოსამართლე ვიოლეტა ფორჩხიძემ დღეს სასამართლო პროცესზე მხარეებს – „ინტერპრესნიუსის“ ჟურნალისტს ნინო ხოზრევანიძესა და აჭარის უმაღლესი საბჭოს თავმჯდომარეს, ავთანდილ ბერიძეს მორიგება შესთავაზა.


ჟურნალისტმა სასამართლოს განუცხადა, რომ თანახმაა მორიგებაზე, ოღონდ იმ პირობით, თუ ავთანდილ ბერიძე სპეციალურ ბრიფინგზე უარყოფს, მის მიერ 11 თებერვალს გაკეთებულ განცხადებას, როდესაც მან ნინო ხოზრევანიძეს მატყუარა უწოდა.


უმაღლესი საბჭოს თავმჯდომარე ავთანდილ ბერიძე სასამართლოში არ გამოცხადებულა. მისმა წარმომადგენელმა გელა ღოღობერიძემ მოსამართლეს უთხრა, რომ უარყოფასთან დაკავშირებით კონსულტაციები თავის მარწმუნებელთან არ გაუვლია, ამიტომ მხარეს სთხოვა ნათლად ჩამოაყალიბოს, რას გულისხმობს უარყოფაში. გელა ღოღობერიძე: „ჩემ სუბიექტურ აზრს მოგახსენებთ: მასალა იყო ტყუილი და არა პიროვნება – ნინო ხოზრევანიძე“.


ავთანდილ ბერიძე
ავთანდილ ბერიძე


გელა ღოღობერიძემ იქვე დასძინა,  რომ ავთანდილ ბერიძეს საკუთარი აზრის გამოთქმას არც ერთი კანონი არ უკრძალავს. ჟურნალისტსაც უნდა ჰქონდეს თავისი ეთიკა“.


წელს 11 თებერვალს უმაღლესი საბჭოს თავმჯდომარემ, ავთანდილ ბერიძემ ორშაბათის ტრადიციულ ბრიფიგზე ნინო ხოზრევანიძეს მატყუარა უწოდა.  

 

„ეს არ იყო პირველი შემთხვევა და მე არ ვყოფილვარ გამონაკლისი, ვისაც ავთანდილ ბერიძემ ცრუ ინფორმაციის გავრცელებაში დასდო ბრალი,“ – სარჩელის შეტანის დროს ასეთი მოტივაცია ჰქონდა ნინო ხოზრევანიძეს.

 

ავთანდილ ბერიძეს სასამართლოში კიდევ ერთი ჟურნალისტი – ტარიელ ცეცხლაძე უჩივის.

 

ჟურნალისტების ინტერესებს სასამართლოში საია იცავს.

 

ნეტგაზეთის მასალების სხვა გამოცემებში გადაბეჭდვის წესი
ბათუმელები