Batumelebi | ვისთვისაც ძვირფასია თავისუფალი სიტყვა ვისთვისაც ძვირფასია თავისუფალი სიტყვა – Batumelebi
RU | GE  

ვისთვისაც ძვირფასია თავისუფალი სიტყვა

 

25 იანვარს, საქართველოს პრეზიდენტის მიერ ქალაქ ბათუმში სამხედრო აღლუმის მიღებისა და ქალაქის დატოვების შემდეგ, მოეწყო პრეზიდენტის მხარდამჭერთა მშვიდობიანი მსვლელობა-აქცია, რომელმაც მოგვიანებით მიტინგის სახე მიიღო.

აღლუმი 4

მშვიდობიან მიტინგს დასაშლელად ე.წ. „სპეცრაზმი“ შეესია და მომიტინგეები დაარბია. მიუხედავად ამისა, მომიტინგეებმა გააგრძელეს ქალაქის ქუჩებში მსვლელობა.

„გაზეთ ბათუმელების“ ჟურნალისტები პროფესიული მოვალეობის მოხდის მიზნით, ბუნებრივია, მიმდინარე მოვლენების ეპიცენტრში იმყოფებოდნენ.

აღლუმი 2

მიტინგის  დარბევის შემდეგ შეიქმნა ნაცნობი (ყოველ შემთხვევაში ჟურნალისტებისათვის) სიტუაცია, რომელიც ბოლო დროს ხშირად მოსდევს ხოლმე ანალოგიურ აქციებს, სადაც ადგილობრივი ხელისუფლებისგან განსხვავებული აზრი ფიქსირდება. ანუ, ამჯერადაც, მიტინგის დარბევის შესახებ ბრძანებას გასცემდა და უშუალოდ დარბევას ახორციელებდა ერთი და იგივე ჯგუფი.

აღლუმი 5

ეს ის ჯგუფია, რომელსაც ანალოგიური აქციები და მასმედიის სხვადასხვა საშუალების  ჟურნალისტები ხშირად, ზოგჯერ უსასტიკესადაც კი დაურბევია.

25 იანვარს „გაზეთ ბათუმელების“ ჟურნალისტებს ე.წ. „სპეცრაზმმა“ არ მისცეს საშუალება პროფესიული მოვალეობის შესრულებისა, კიდევ ერთხელ შეურაცხყეს სიტყვიერად, დაუმტვრიეს ციფრული ფოტოაპარატი და წაართვეს მეხსიერების ბარათი, რომელზედაც მიმდინარე მოვლენები და თავად დამრბევი ჯგუფი იყო დაფიქსირებული.

უახლოეს წარსულში ჟურნალისტების, კერძოდ „გაზეთ ბათუმელების“ თანამშრომლებისადმი სიტყვიერი შეურაცხყოფის, ფიზიკური ანგარიშსწორებისა და აპარატურის დამტვრევა-დაზიანების არაერთ ფაქტს ჰქონდა ადგილი, რის შესახებაც, რედაქციამ აჭარის შინაგან საქმეთა სამინისტროს წერილობით მიმართა.

აღლუმი 6

ბოლო ორი კვირის განმავლობაში სცემეს „გაზეთ ბათუმელების“ ერთ-ერთი თანამშრომელი,  შემდეგ კი, სოფელ გონიოში გამართულ მიტინგზე ჩვენს რამდენიმე ჟურნალისტს მიაყენეს ფიზიკური და სიტყვიერი შეურაცხყოფა, დაუმტვრიეს დიქტოფონი და ციფრული ფოტოაპარატი. ხშირია რედაქციის თანამშრომლებისადმი მუქარაც.

„გაზეთი ბათუმელები“ ვერანაირად ვერ შეეგუება თავისუფალი ჟურნალისტებისადმი და, საერთოდ, განსხვავებული აზრის მქონეთა მიმართ, აღნიშნულ ვანდალურ დამოკიდებულებას, ვისგანაც არ უნდა მომდინარეობდეს იგი.

გამომდინარე აქედან საქართველოს ცენტრალური ხელისუფლებისაგან, აჭარის ავტონომიური რესპუბლიკის ხელმძღვანელობისა და ყველა შესაბამისი სამსახურებისაგან, კატეგორიულად მოვითხოვთ შეწყდეს თავისუფალი ჟურნალისტების დევნა-დაშანტაჟება და მასმედიის წარმომადგენლებს მიეცეთ ნორმალური მუშაობის საშუალება!

აღლუმი 7

მოვითხოვთ, ერთხელ და სამუდამოდ ყველაფერს მიეცეს სამართლებრივი შეფასება.

მოვითხოვთ აგრეთვე, რომ შეწყდეს „გაზეთ ბათუმელებისაგან“ მტრის ხატის შექმნა და მავანთა მხრიდან მისი დისკრედიტაციის მცდელობა!

„გაზეთი ბათუმელები“ მიმართავს ყველა საერთაშორისო ორგანიზაციას, საქართველოში აკრედიტებულ უცხოეთის სახელმწიფოთა დიპლომატიურ კორპუსებს, ყველას, ვისთვისაც ძვირფასია თავისუფალი სიტყვის, საერთოდ ადამიანის საყოველთაოდ აღიარებული უფლებანი და თავისუფლებანი, ხმა აიმაღლონ აჭარაში  ჟურნალისტთა უფლებების დასაცავად.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.