სახელმწიფოს მონაწილეობით დაფუძნებული ფონდებისგან გრანტების გაცემის დროს ჟიურის წევრი ექსპერტების ვინაობა ცნობილი იქნება. გადაწყვეტილება საკონსტიტუციო სასამართლოს პირველმა კოლეგიამ დღეს, 27 მარტს, გამოაცხადა.
სარჩელის ავტორი გიორგი კრავეიშვილი იყო, რომელიც მიიჩნევდა, რომ ნებისმიერი სახის გრანტის მოპოვების დროს საჯარო უნდა იყოს ექსპერტების ვინაობა, ვინც პროექტს არჩევს. მოსარჩელე კონკრეტულად რუსთაველის ეროვნულ ფონდში გრანტების განხილვის პრაქტიკას აპროტესტებდა.
საკონსტიტუციო სასამართლომ ამ გადაწყვეტილებით ანტიკონსტიტუციურად მიიჩნია მთავრობის დადგენილება „ფუნდამენტური კვლევებისთვის სახელმწიფო სამეცნიერო გრანტების შესახებ“. ეს სამართლებრივი აქტი გრანტის გამცემ ორგანიზაციას აქამდე არ ავალდებულებდა საჯარო გაეხადა ჟიურის შემადგენლობა.
მოსარჩელის, გიორგი კრავეიშვილის აზრით, გრანტის შერჩევის პროცესში ექსპერტების ვინაობის დაფარვა ეწინააღმდეგებოდა „საქართველოს კონსტიტუციის“ 41-ე მუხლს, რომლის მიხედვითაც ადამიანს აქვს უფლება გაეცნოს მის შესახებ არსებულ ინფორმაციას.
