საქართველოს მუნიციპალური განვითარების ფონდმა სასკოლო ინფრასტრუქტურის მოწყობისათვის საჭირო მოდულების [კონტეინერების] შესყიდვაზე ხელშეკრულება შპს „ევრო პანელ ჯგუფთან“ 19,5 მილიონ ლარზე გააფორმა.
ხელშეკრულების მიხედვით, რომელიც 2026 წლის 19 ოქტომბერს გაფორმდა, კომპანია ფონდს თურქული წარმოების მოდულებს სთავაზობს:
წყარო: ხელშეკრულება
ხელშეკრულება მოდულური სასკოლო ინფრასტრუქტურის მოწყობისათვის საჭირო მოდულების მიწოდებასა და მონტაჟს ითვალისწინებს.
ამასთან, „სახელშეკრულებო ღირებულება მოიცავს შესყიდვის ობიექტის მიწოდებასთან დაკავშირებულ ყველა ხარჯს და „მიმწოდებლისათვის“ კანონმდებლობით გათვალისწინებულ ყველა გადასახადს“.
რაც შეეხება მოდულების მიწოდების ვადას და ადგილს, ხელშეკრულებაში აღნიშნულია:
- „ხელშეკრულების გაფორმებიდან 15 დღის ვადაში მიმწოდებელი ვალდებულია შემსყიდველს შესათანხმებლად წარუდგინოს თითოეული მოდულის ტიპური პროექტი.
- მოდულის ტიპური პროექტის შეთანხმების შემდგომ, მიმწოდებელი ვალდებულია შესყიდვის ობიექტის მიწოდება განახორციელოს შემსყიდველის წერილობითი დავალების შესაბამისად.
- მიმწოდებელს უნდა შეეძლოს საჭიროების შემთხვევაში, წერილობითი დავალების მიღებიდან 2 თვის განმავლობაში არანაკლებ 200 მოდულის მიწოდება და მონტაჟი.
- ამასთან, ხელშეკრულებით გათვალისწინებული შესყიდვის ობიექტის მიწოდების საერთო ვადაა ხელშეკრულების გაფორმებიდან 2028 წლის 31 დეკემბრის ჩათვლის პერიოდი.
- შესყიდვის ობიექტის მიწოდების და მონტაჟის არეალს წარმოადგენს საქართველოს მთელი ტერიტორია. ობიექტების ზუსტი ადგილმდებარეობა დაზუსტდება შემსყიდველის მხრიდან შესაბამისი წერილობითი დავალების გაცემის საფუძველზე“.
მოდულების ექსპლუატაციის ვადა 11 წელი უნდა იყოს.
ხელშეკრულებაში აღნიშნულია, რომ „შემსყიდველი არ იღებს ვალდებულებას, შეისყიდოს ტექნიკური დავალებით მითითებული სრული რაოდენობა.“
წყარო: ხელშეკრულება
სამეწარმეო რეესტრის მიხედვით „ევრო პანელ ჯგუფი“ თბილისში 2022 წელს რეგისტრირებული კომპანიაა, რომლის დირექტორი და 34 პროცენტის წილის მფლობელია გიორგი ლოლუა. კომპანიის დანარჩენ წილებს, 33-33 პროცენტს, ფლობენ ასევე არმენ ადამიანცი და გიორგი შოშიტაიშვილი.
შესყიდვების პორტალის მიხედვით კი, „ევრო პანელ ჯგუფი“, სახელმწიფო დაცვის სპეციალური სამსახურის მიერ დაცვის ჯიხურების შესყიდვაზე გამოცხადებულ 2 ტენდერშია გამარჯვებულად გამოვლენილი. სახელშეკრულებო თანხა ჯამში 569 ათას 536 ლარია. ამ ტენდერებშიც „ევრო პანელ ჯგუფი“ უკონკურენტო იყო.
მოდულური სასკოლო ინფრასტრუქტურის მოწყობისათვის საჭირო მოდულების [თანმდევი მომსახურებით, მიწოდებითა და მონტაჟით] სახელმწიფო შესყიდვაზე მუნიციპალური განვითარების ფონდს ტენდერი 22 მილიონ 450 ათასი ლარით ჰქონდა გამოცხადებული.
ამ თემაზე:
„ოცნების მთავრობა“ ასაწყობ სკოლებს ყიდულობს – გამოყოფილია 22 მილიონი ლარი
