“მინდოდა პირადად მოსვლა სოლიდარობის და მხარდაჭერის გამოსახატად თქვენდამი, მზია ამაღლობელის მიმართ, რომელიც ბევრი თვეა უკვე ციხეშია და სასამართლოს განაჩენს ელის,“ – ასე დაიწყო ინტერვიუ “ბათუმელებთან” ევროკავშირის ელჩმა საქართველოში პაველ ჰერჩინსკიმ.
ევროკავშირის ელჩი “ბათუმელებს” დღეს, 20 ივნისს ესტუმრა. ელჩმა გამოცემას ვრცელი ინტერვიუ მისცა. გთავაზობთ ამ ინტერვიუს ნაწყვეტს. ვრცელი ინტერვიუ მოგვიანებით გამოქვეყნდება.
პაველ ჰერჩინსკი, ევროკავშირის ელჩი საქართველოში:
მზიას საქმე ევროკავშირის დღის წესრიგისთვის მნიშვნელოვანია. ჩვენ ამ საქმეს დიდი შეშფოთებით ვაკვირდებით. როგორც იცით, ევროპარლამენტში მიმდინარეობდა დებატები, რომელიც საქართველოში მედიის თავისუფლებას ეხებოდა. მზიას საქმესთან დაკავშირებით ევროპარლამენტმა გუშინ მიიღო რეზოლუცია. წარსულშიც მისაუბრია მზიას საქმეზე და ვფიქრობ, რომ მზია არის ჟურნალისტური გამბედაობის სიმბოლო.
ყველა შოკირებული ვართ არაპროპორციულობით მის საქმესთან დაკავშირებით.
ყველა ველით, რით დასრულება ეს განხილვები. ვიცით, რომ მკაცრი და ძალიან არაპროპორციული განაჩენი ემუქრება – 7 წლამდე ციხე იმისთვის, რაც ყველამ ვიცით, რომ აბსოლუტურად არაპროპორციულია მოსალოდნელ განაჩენთან მიმართებაში.
ყველამ ვიცით, რომ მზია და „ბათუმელები“ კრიტიკულები იყვნენ ხელისუფლების მიმართ იმის მიუხედავად, ვინ იყო ხელისუფლებაში. ვიცით, რომ თქვენი პროფესიული საქმიანობის განმავლობაში ყოველთვის სიმართლეს ამბობდით, თუნდაც ეს კრიტიკული ყოფილიყო ხელისუფლების მიმართ.
ჩვენ თვალს ვადევნებთ ამ სასამართლოს, ზოგადად რა ხდება საქართველოში, რაც შეეხება სიტყვის და შეკრების თავისუფლებას, დიდ ზეწოლას თავისუფალ მედიაზე. ასევე, ძალიან დიდი ზეწოლაა სამოქალაქო საზოგადოებაზე, რაც ნამდვილად გულსატკენია. ეს რეალურად გულსატკენია, რადგანაც არც ისე დიდი ხნის წინ საქართველო მოწინავე ქვეყანა იყო, როცა საქმე ეხებოდა დემოკრატიულ ცვლილებებს, ევროკავშირში ინტეგრაციას.
ახლა ეს შეიცვალა. რაც შეეხება ევროინტეგრაციას – საქართველოს ევროკავშირის წევრობისკენ მიმავალი გზა შეჩერებულია. ეს ნამდვილად რთულია ყველასთვის, ვისაც საქართველოსთვის კარგი უნდა.
მაგრამ ჩვენ, როგორც ევროკავშირი, აქ ვრჩებით.
საქართველოს მოსახლეობას თავისთვის და თავისი შვილებისთვის უკეთესი მომავალი უნდა. გვესმის, რომ საქართველოს მოქალაქეები არიან ევროპელები და ღირსები დაიკავონ ადგილი ჩვენს შორის – ევროკავშირის წევრ ქვეყნებს შორის.
საქართველოს ევროკავშირის კანდიდატი ქვეყნის სტატუსი მივანიჭეთ და გულწრფელად იმედი გვაქვს, რომ არსებული ნეგატიური ტრენდი შეიცვლება, საქართველოში მიმდინარე ძალიან ღრმა, პოლიტიკური კრიზისი დასრულდება და დიალოგი, საღი აზრი გაიმარჯვებს. საქართველო სარგებელს მიიღებს ევროკავშირის წევრობით მომავალში.
საქართველოს მოქალაქეები ნამდვილად იმსახურებენ უკეთეს მომავალს თავისთვის, თავიანთი შვილებისთვის.
ჩვენ, ევროკავშირის წევრი 27 ქვეყანა ამ საკითხს განვიხილავთ, ამაზე ვფიქრობთ. ჩვენ საქართველოს არ მივატოვებთ. ევროკავშირის წევრი ქვეყნების საგარეო საქმეთა მინისტრები 23 ივნისს, ორშაბათს, საქართველოს საკითხს განიხილავენ. თქვენ იცით, რომ მსოფლიოში ძალიან ბევრი მოვლენა ხდება, მაგრამ როდესაც პრაქტიკულად ყოველ თვეში ევროკავშირის წევრი ქვეყნების საგარეო საქმეთა მინისტრები ერთმანეთს ხვდებიან, ისინი საქართველოს საკითხს ასევე განიხილავენ. ძალიან რთულია შემდეგ ნაბიჯებზე შეთანხმება.
რაც შემიძლია, რომ ვთქვა – ევროკავშირის უმაღლესი წარმომადგენლის კაია კალასის და ასევე, ევროკომისარი გაფართოების საკითხებში მარტა კოსის თანახმად: მზად ვართ დიალოგისთვის, მზად ვართ დახმარებისთვის, მზად ვართ ხელშეწყობისთვის; მაგრამ, ტანგოს საცეკვაოდ ორია საჭირო.
სამწუხაროდ, ვერ ვხედავთ ხელისუფლების კეთილ ნებას, პირიქით, ვხედავთ გაუარესებულ მდგომარეობას ადამიანის უფლებების კუთხით და უკუსვლას დემოკრატიულ ღირებულებებთან მიმართებით, სამოქალაქო საზოგადოების ორგანიზაციებზე თავდასხმას, დამოუკიდებელ მედიაზე ზეწოლას;
გრძელდება თავდასხმა ევროკავშირზე, ევროკავშირი დემონიზირებულია, ევროკავშირს აბუჩად იგდებენ, ბევრ ევროპელ პოლიტიკოსს შეურაცხყოფა მიაყენეს, ეს ნამდვილად გულსატკენია.
ვაპირებთ, ვიყოთ მომთმენები. გადავწყვიტეთ, როგორც ევროკავშირი, მივესალმოთ საქართველოს, როგორც ჩვენი წევრი ქვეყნებიდან ერთ-ერთს, მაგრამ ეს უნდა მოხდეს მკაფიო კრიტერიუმებზე დაყრდნობით. ეს კრიტერიუმები ეხება ყველა კანდიდატ ქვეყანას. უნდა იყოს დაფუძნებული ჩვენ საერთო ღირებულებზე, როგორიცაა თავისუფლება, დემოკრატია, კანონის უზენაესობა, ადამიანის უფლებები.
ევროკავშირის თვალსაზრისით ეს ღირებულებები გადახედვას არ ექვემდებარება. სამწუხაროდ, ბოლო დროს საქართველო ევროკავშირთან დაახლოების ნაცვლად [როგორც, მაგალითად, უკრაინა და მოლდოვა] პირიქით, შორდება. ჩემთვის, როგორც საქართველოში ევროკავშირის ელჩისთვის ეს ნამდვილად დასანანია, გულსატკენია, მაგრამ იმედს არ ვკარგავთ”.
- ბათუმელები: რამდენად არის მოსალოდნელი სანქციები, ამ რეზოლუციის მიღების შემდეგ, იმ პირების მიმართ, რომლებიც მონაწილეობენ მზია ამაღლობელის და სხვა პოლიტპატიმრების საქმეებში?
პაველ ჰერჩინსკი: “ბევრჯერ უკითხავთ და ყოველთვის ვცდილობდი, რომ მეპასუხა გულახდილად, საზოგადოების ინფორმირება მომეხდინა არსებულ მდგომარეობასა და ევროკავშირის მოსაზრებებზე. სანქციებზე როცა ვსაუბრობ, მმართველი პარტიის წარმომადგენლები ყოველთვის ძალიან მძიმედ მაკრიტიკებენ, იარლიყებს მაკერებენ, ცდილობენ ზეწოლას, რაც ჩემთვის ძალიან უსიამოვნოა.
ევროკავშირისთვის სანქციების მიღება რთულია, რადგან ეს ერთხმად უნდა მოხდეს, საჭიროა ერთსულოვნება – 27-ივე წევრი ქვეყანა უნდა დათანხმდეს.
როცა სანქციებზე ვსაუბრობთ, ვიცით, რატომ ხდება ასე – რამდენად მძლავრია ევროკავშირის სანქციები. ეს მარტო იმას კი არ ეხება, რომ ვიღაცას ევროკავშირში არ შემოუშვებენ, ვიღაცას ევროკავშირში არსებულ ქონებას გაუყინავენ, ეს ასევე არის სირცხვილის საკითხი; წარმოიდგინეთ, ევროკავშირის მიერ დასანქცირებულს როგორ შეხედავენ მეგობრები, ოჯახის წევრები, საზოგადოება.
ამიტომ სანქციების საკითხს უკიდურესად სერიოზულად ვუყურებთ. რამდენიმე თვის განმავლობაში ვცდილობთ მივიღოთ სანქციები, რომელიც დაკავშირებულია ადამიანის უფლებების დარღვევებთან.
ყველამ ნახეთ ტელეეკრანებზე თბილისის და საქართველოს სხვა ქალაქების ქუჩებში არაიდენტიფიცირებული, ნიღბიანების მიერ სასტიკად ნაცემი ადამიანები. ნანახმა მთელი მსოფლიო დაშოკა.
რაც უფრო შოკის მომგვრელია, არის სრული დაუსჯელობა: ამ უპრეცედენტო ძალადობის გამო, პასუხისგებაში არავინ არ მიუციათ. ევროკავშირი გმობს ძალადობას, ძალადობა მიუღებელია ნებისმიერი მხრიდან. ჩვენ ვნახეთ, რომ ადამიანის უფლებების დამრღვევები დაუსჯელი დარჩნენ, რაც ნამდვილად შემაშფოთებელია.
ამიტომაც რამდენიმე თვის განმავლობაში ვცდილობთ, მივიღოთ სანქციები ევროკავშირის დონეზე, რასაც ერთსულოვნება სჭირდება, რომელიც არ გვაქვს.
ამიტომაც, ევროკავშირის რამდენიმე წევრმა ქვეყანამ ეროვნულ დონეზე ორმხრივი სანქციები მიიღო, ასეთი ქვეყნების რაოდენობა იზრდება.
ვიცი, რომ ორშაბათს, 23 ივნისს ევროკავშირის სანქციების საკითხი ისევ განიხილება და ეს ევროკავშირის წევრმა ქვეყნებმა უნდა გადაწყვიტონ; ეს 27 წევრი ქვეყნის გადაწყვეტილება იქნება, რასაც ერთსულოვნება სჭირდება. დღის წესრიგშია ეს საკითხი, როგორც საქართველოსთან, ისე სხვა ქვეყნებთან მიმართებით, სადაც ადამიანის უფლები ირღვევა; ევროკავშირი იმოქმედებს და თავის პოზიციას გამოხატავს”.
