რუსეთის თავდასხმის შედეგად კიევში 17 ივნისის ღამეს 14 ადამიანი დაიღუპა და 60 დაშავდა.
ეს წინასწარი მონაცემებია, დაღუპულთა და დაშავებულთა რაოდენობა ჯერ ისევ ზუსტდება.
როგორც შემთხვევის ადგილიდან გადაღებული ვიდეოდან ჩანს, კიევში მრავალსართულიანი საცხოვრებელი კორპუსის მთელი შესასვლელი განადგურდა.
კიევის მერის, ვიტალი კლიჩკოს თქმით, 40-ზე მეტი ბინა არის განადგურებული.
„შესაძლოა ნანგრევების ქვეშ ხალხი იყოს. ჩვენ არ გამოვრიცხავთ, რომ დაღუპულთა რიცხვი გაიზარდოს“, – ამბობს კიევის მერი.
უკრაინის შინაგან საქმეთა მინისტრმა იგორ კლიმენკომ განაცხადა, რომ კიევის სხვადასხვა რაიონში 27 ადგილი მტრის ცეცხლის ქვეშ იყო. მათ შორის იყო საცხოვრებელი შენობები, საგანმანათლებლო დაწესებულებები და კრიტიკული ინფრასტრუქტურის ობიექტები.
