თემურ ქათამაძის გაძევება იძულების წესით მოხდა – შს სამინისტრო

შს სამინისტროს ინფორმაციით, თემურ ქათამაძე (გაფფარ ილმაზი), ბათუმის საპროტესტო აქციების მედროშე, ქვეყნიდან იძულებით გააძევეს.

„მისი გაძევება მოხდა საქართველოს კანონმდებლობის სრული დაცვით, სასამართლოს მიერ კანონიერ ძალაში შესული გადაწყვეტილების შესაბამისად.

აღნიშნული პირის საქმესთან დაკავშირებით, სასამართლოს რვა სხვადასხვა ინსტანციაში ჩატარდა განხილვები და სასამართლომ სრულად გაიზიარა შს სამინისტროს მიგრაციის დეპარტამენტის პოზიცია.

ასევე დაცვის მხარემ დროებითი ღონისძიების მოთხოვნით მიმართა ადამიანის უფლებათა დაცვის ევროპულ სასამართლოს, რომელმაც მისი მოთხოვნა არ დააკმაყოფილა.

გაფფარ ილმაზმა არ ისარგებლა ქვეყნის ნებაყოფლობითი დატოვების შესაძლებლობით, შესაბამისად, მისი გაძევება იძულების წესით მოხდა“- განაცხადა ალექსანდრე დარახველიძემ, შს მინისტრის მოადგილემ ბრიფინგზე დღეს, 11 ივნისს.

11 ივნისს ბათუმის საპროტესტო აქციების მედროშე თემურ ქათამაძე ქვეყნიდან იძულების წესით გააძევეს. როგორც მისი მეგობარი ნინო კაკულია „ბათუმელებთან“ საუბარში ამბობდა, ქათამაძის გაძევება მოხდა გვიან ღამით, ისე, რომ ამის თაობაზე არ ყოფილა ინფორმირებული არც ქათამაძის ადვოკატი და არც მისი მეგობრები.

თემურ ქათამაძე 2025 წლის 11 იანვარს ბათუმის პოლიციის სამმართველოსთან აქციაზე დააკავეს.

ადმინისტრაციული დაკავებიდან გათავისუფლებული თემურ ქათამაძე, იზოლატორის ეზოშივე მეორედ დააკავეს, მას ქვეყანაში არალეგალურ ყოფნას ედავებოდნენ, მიუხედავად იმისა, რომ თემურ ქათამაძე 13 წელი საქართველოში ცხოვრობს და მან რამდენჯერმე მიმართა საქართველოს მთავრობას მოქალაქეობის უფლების მინიჭებაზე, თუმცა დადებითი პასუხი ვერ მიიღო.

მიგრაციის დეპარტამენტის დროებითი მოთავსების იზოლატორში თემურ ქათამაძე პროტესტის ნიშნად შიმშილობდა. დაკავების შემდეგ ის ითხოვდა ჰუმანიტარულ და ლტოლვილის სტატუსს, თუმცა „ოცნების“ ხელისუფლებამ ამ სტატუსზეც უარი უთხრა.