რუსმა კოსმონავტებმა კოსმოსში გაშალეს რუსული არმიის ძველი საბრძოლო დროშა ქრისტეს გამოსახულებით, რომელიც დედამიწაზე დაბრუნების შემდეგ რუს სამხედროებს გადაეცემათ. ინფორმაციას ამის შესახებ რუსული პროპაგანდისტული მედია, მათ შორის კრემლის მთავარი პროპაგანდისტი ვლადიმერ სალავიოვი, საკუთარ ტელეგრამ არხზე ავრცელებს.
„ჩვენ რუსები ვართ, ღმერთი ჩვენთანაა! გამარჯვება ჩვენი იქნება!“ ციტირებს რუსული პროპაგანდა „როსკოსმოსის“ კოსმონავტების სერგეი რიჟიკოვის, ალექსეი ოვჩინინის და ივან ვაგნერის სიტყვებს.
„დედამიწიდან 407 კილომეტრის სიმაღლეზე. ჩვენთან ერთად ფრიალებს პირველი რუსული დროშა [стяг]. იგი საჩუქარია საქველმოქმედო პროექტის მხატვრებისგან – „მშვიდობისთვის ჩვენი გამარჯვების შემდეგ“. მათ შეავსეს ქრისტეს გამოსახულება ალექსანდრე სუვოროვის [რუსი მხედართმთავარი] სიტყვებით და ციტატით პატრიარქის [კირილი] მშვიდობის ლოცვიდან…
ეს დროშა აკურთხებს ჩვენს მეომრებს მე-12 საუკუნიდან, ანდრეი ბოგოლიუბსკის დროიდან… ახლა დროშა, როგორც გამარჯვების სიმბოლო, ამაღლდა მთელ დედამიწაზე. მალე იგი ფრონტის ხაზზე მყოფ ჩვენს ჯარისკაცებს გადაეცემათ“ – ციტირებს რუსული მედია კოსმონავტებს.
რუსული მედია ასევე იუწყება, რომ ეს დროშა ერთი წლის წინ, სევასტოპოლის წმინდა ნიკოლოზის ეკლესიაში აკურთხეს, სადღესასწაულო ლოცვის შემდეგ, რომელშიც რუსეთის ეროვნული გვარდიის სამხედრო მოსამსახურეები მონაწილეობდნენ.
ეს ლოზუნგი რუსული ჯარის და მათ მიერ გაჩაღებული ომის პროპაგანდის ნაწილია. მას ხშირად იყენებენ რუსი ჩინოვნიკები და სხვა პროპაგანდისტები, რუსეთის აგრესიის გასამართლებლად და ზოგადად, კრემლის „მტრების“ გასაშავებლად. „ჩვენ რუსები ვართ. ღმერთი ჩვენთანაა! რა გამოდის, ვინ არის თქვენთან?“ – წერდა დუგინი იანვრის თვეში.
დამოუკიდებელი რუსული მედია გამოცემა „მედუზა“ ამავე ლოზუნგის შესახებ მომზადებულ პოდკასტში იუწყება, რომ „ჩვენ რუსები ვართ, ღმერთი ჩვენთანაა“ ფართოდ გავრცელდა ორიათასიან წლებში, რუსული ნაციონალისტური მოძრაობების გაძლიერებასთან ერთად.
მაშინ ციტატა უმეტესად ჩნდებოდა რუსეთის იმპერიის 1858-1883 წლების, შავი, ყვითელი და თეთრი ფერის დროშაზე. „ლოზუნგი ძირითადად ჩნდებოდა ნაციონალისტების დემონსტრაციებზე ისეთი ლოზუნგების გვერდით, როგორიცაა „რუსეთი რუსებისთვის“ და „კმარა კავკასიელების კვება“.
ეს კადრები 2025 წლის მარტის თვეში გამოქვეყნებული მუსიკალური კლიპიდანაა, რომლის ტექსტშიც რუსი ჯარისკაცების ღირსებასა და სიმამაცეზე მღერიან, იქვე სამშობლოს სიყვარულში ეჯიბრებიან დასავლეთს: „არ იტირო ამერიკა და ევროკავშირო, ჩვენი ბიჭები ყველაფერს გასწავლიან“.
კადრი ვიდეოდან – „ჩვენ რუსები ვართ, ღმერთი ჩვენთანაა“
8 აპრილს, რუსული პროგრამით კოსმოსში გაფრენილი კოსმოსური ხომალდი „Союз МС-27“ საერთაშორისო კოსმოსურ სადგურზე გასულ კვირას დაეშვა. „Союз МС-27“ ეკიპაჟის წევრებს შორის არის ალექსეი ზუბრიცკი, რომელიც წარმოშობით ზაპოროჟიეს რეგიონიდანაა და უკრაინული მედიის ცნობით, იგი უკრაინაში სამშობლოს ღალატისთვის არის გასამართლებული – ვინიცის საქალაქო სასამართლომ მას დაუსწრებლად მიუსაჯა 15 წლით თავისუფლების აღკვეთა. ყირიმის ანექსიამდე ზუბრიცკი უკრაინის საავიაციო ქვედანაყოფში პილოტად მსახურობდა.
„2014 წლის მარტიდან მაისის პერიოდში, სევასტოპოლში ყოფნისას, განზრახ, ეგოისტური მიზეზების გამო გადავიდა მტერთან, რითაც ჩაიდინა სახელმწიფო ღალატი, ანუ ქმედებები უკრაინის სუვერენიტეტის, ტერიტორიული მთლიანობისა და ხელშეუხებლობის, თავდაცვისუნარიანობის, სახელმწიფოებრიობის, ეკონომიკური და ინფორმაციული უსაფრთხოების საზიანოდ“, – ნათქვამია სასამართლოს განაჩენში, რომელსაც უკრაინული მედია „უნიანი“ ავრცელებს.
