ბათუმის მერია 3 და 4 მაისს „ბათუმობა 2025“-ის ჩატარებას გეგმავს. ღონისძიების ორგანიზებისთვის ქალაქის ბიუჯეტიდან 141 ათას 225 ლარია გათვალისწინებული. ამ დროისთვის უცნობია ვინ მიიღებს მონაწილეობას და ასევე, უცნობია ინფორმაცია ჰონორარების შესახებ.
ღონისძიება წელსაც ძველ ბულვარში, საზაფხულო თეატრის მიმდებარედ უნდა ჩატარდეს.
ბათუმის კულტურის ცენტრმა ღონისძიების ორგანიზებაზე ორი ტენდერი გამოაცხადა:
ერთი ტენდერი 103 050 ლარით – დაგეგმილია საგამოფენო სივრცის [დახლები] მოწყობა; ჯიხურები, დეკორატიული კასრები; სხვადასხვა დეკორაციის და პოდიუმის მოწყობა; ფოტოგამოფენის ორგანიზება; ფოტო სტენდების და საბავშვო კუთხის უზრუნველყოფა, სახეზე მოხატვა.
ასევე ქეითირინგით უზრუნველყოფა, ტრანსპორტით მომსახურება, კარვით უზრუნველყოფა, სცენის ბადით შეფუთვა, ბანერების ბეჭდვა, პუფებით უზრუნველყოფა და სხვა.
ამ ტენდერში მომსახურებას კულტურის ცენტრს შპს „კრეატივ-ჯგუფი“ სთავაზობს 81 810 ლარად. ხელშეკრულება ამ დროისთვის დადებული არ არის.
მეორე ტენდერი 38 175 ლარით – ლედ ეკრანით მომსახურება, დჯ მაგიდის მოწყობა ლედ ეკრანით, დჯ აპარატურით მომსახურება და DJ კონცერტის უზრუნველყოფა, კაბელარხებით მომსახურება.
აღნიშნულ ტენდერში მომსახურებას კულტურის ცენტრს შპს „ჯითი ჰოლდინგი“ სთავაზობს 26 475 ლარად. ხელშეკრულება ჯერ არც ამ კომპანიასთან არის გაფორმებული.
„ბათუმობისთვის“ გასულ 2024 წელს, ქალაქის ბიუჯეტიდან 300 ათასამდე ლარი დაიხარჯა ორგანიზებასა და ჰონორარებში.
___________________
ფოტოზე: „ბათუმობა 2018“. ფოტო „ბათუმელების“ არქივიდან
