„კანონში ის წერია, რის გამოც პაოლო იაშვილმა მწერალთა სახლში ტყვია დაიხალა“ – წერს ფეისბუქის პირად გვერდზე თაზო კირტავა, „ახალგაზრდა იურისტთა ასოციაციის“ ადამიანის უფლებების პროგრამის ანალიტიკოსი. იურისტი პოსტში ფეისბუქის მომხმარებლებისთვის მარტივად განმარტავს, რა საფრთხეს შეიცავს რუსული კანონი, რომელიც პარლამენტმა მესამე მოსმენით უკვე მიიღო.
„წარმოიდგინეთ, ხვალ დაგადგათ პატივცემული რატი ბრეგაძის უწყების წარმომადგენელი.
(არაა აუცილებელი NGO-ში ან მედიაში მუშაობდეთ. წარმოიდგინეთ, რომ საერთოდ არსად არ მუშაობთ).
გითხრათ, რომ მათი ვარაუდით, თქვენ გაქვთ ინფორმაცია უცხოეთის ინტერესების გამტარებზე.
მოგთხოვათ პირადი მიმოწერები, გამოგკითხათ, ვისთან გაქვთ სექსი, რომელ პარტიას ემხრობით.
მერე გამოგკითხათ, თქვენი ძმაკაცი რომ არის, ეგ ვისთან დადის ღამღამობით, რა იდეებს ატარებს, სად ლოცულობს და ა.შ.
არ ეტყვით – დაისჯებით.
არ მიაწვდით მოთხოვნილ მასალებს – დაისჯებით.
რაში სჭირდებათ ეგ ინფორმაცია? მონიტორინგში. „დანოსში“ რაღაცები წერია და უნდა გადაამოწმონ. და საერთოდ, რამდენ კითხვას სვამთ, კანონით სრული უფლება აქვთ ეს ყველაფერი მოგთხოვონ. მოკეტე და რასაც გეკითხებიან იმაზე უპასუხე, თორემ დაისჯები.
აი, ეგ წერია ამ კანონში, ადამიანური ენით რომ ითქვას.
თან თავიდან მთლად ასე ცხადად არ ეწერა, მერე გააპარეს.
და ამათთან ამ კანონის გაკეთილშობილებაზე და გაუმჯობესებაზე მსჯელობის სჯერა ვინმეს?
მოკლედ, კანონში ის წერია, რის გამოც პაოლო იაშვილმა მწერალთა სახლში ტყვია დაიხალა და ვინმეს თუ ჰგონია, ვაჭარბებ და ვაზვიადებ, თავს იტყუებთ, მეგობრებო“ – წერს თაზო კირტავა.
შეგახსენებთ, რომ „ქართულმა ოცნებამ“ უცხოური გავლენის გამჭვირვალობის შესახებ რუსულ კანონში ისეთი ცვლილება შეიტანა, რომელიც კანონს მონიტორინგის ნაწილში ფიზიკურ პირებსაც შეახებს.
აქ საუბარი არ არის იმაზე, რომ კანონპროექტში შევიდა ცვლილებები, რომლითაც ფიზიკური პირები არასამთავრობო ორგანიზაციებისა და მედიისთვის გათვალისწინებული „უცხო ძალის ინტერესების გამტარებლების“ რეესტრში მოხვდებიან, თუმცა სახელმწიფოს შეეძლება ფიზიკური პირებისთვის პერსონალური ინფორმაციის მოთხოვნა და მათი დაჯარიმება.
ამავე თემაზე: რუსულ კანონში შესული ცვლილებით მონიტორინგი და ჯარიმები ფიზიკურ პირებსაც შეეხება
რა ხდება
საქართველოში მიმდინარე მრავალათასიანი საპროტესტო აქციების მიუხედავად, საქართველოს პარლამენტმა 14 მაისს რუსული კანონი მესამე მოსმენით დაამტკიცა. კენჭისყრაში მონაწილეობა 116-მა დეპუტატმა მიიღო. მათგან, რუსული კანონის მიღებას მხარი 84-მა დეპუტატმა დაუჭირა.
რუსული კანონი ახლა პრეზიდენტს ხელმოსაწერად უნდა გაეგზავნოს. პრეზიდენტს ვეტოს გამოსაყენებლად ორკვირიანი ვადა აქვს, თუმცა „ქართულ ოცნებას“ პარლამენტში საკმარისი მანდატები აქვს იმისათვის, რომ პრეზიდენტის ვეტო დაძლიოს.
შეგახსენებთ, რომ რუსული კანონი 2023 წლის მარტში მასობრივი პროტესტის შემდეგ „ოცნებამ“ უკან გაიწვია და პირობა დადო, რომ მას აღარასოდეს დაუბრუნდებოდა, თუმცა ერთი წლის შემდეგ „ოცნებამ“ კანონპროექტი უკან დააბრუნა.
ანალოგიურმა კანონმა რუსეთში გააქრო ყველა დემოკრატიული ინსტიტუტ და გაამყარა პუტინის რეჟიმი.
