რუსეთში, ვოლგოგრადის ოლქში, საჯარისო ნაწილში ხანძარი იყო – იტყობინება რეგიონის ადმინისტრაცია. ოლქის გუბერნატორის, ანდრეი ბოჩაროვის თქმით, ხანძარი ოპერატიულად ჩააქრეს.
„არავინ დაშავებულა, არც სამოქალაქო ობიექტები დაზიანებულა. ხანძრის გარემოებების გამოძიება მიმდინარეობს“, – აღნიშნა მან.
როგორც გამოცემა „მედუზა“ წერს, ხანძარი წუხელ, 16 ნოემბერს, ღამის პირველ საათზე დაიწყო და მისი ჩაქრობა დილის ხუთი საათისთვის მოხერხდა. ტელეგრამ-არხ „ასტრას“ ცნობით, ხანძრის მიზეზი დრონის თავდასხმა იყო, ტელეგრამ-არხი „ბაზა“ კი წერს, რომ ხანძრამდე ადგილობრივებმა დრონის ფრენის ხმაც გაიგეს.
„ასტრა“ აგრეთვე აღნიშნავს, რომ ამ საჯარისო ნაწილში საკმაოდ დიდი ოდენობით ინახავენ ტყვია-წამალს და ხანძარი სწორედ საწყობში დაიწყო.
ადგილობრივი გამოცემა „ვოლგოგრად ონლაინი“ წერს, რომ ხანძრის ამსახველ ვიდეომასალებში ნათლად ისმის აფეთქების ხმები.
მედიის ცნობით, ხანძრის შედეგად სამხედროები არ დაშავებულან, თუმცა, „ვოლგოგრად ონლაინს“ ამ ნაწილის ერთ-ერთი სამხედრო პირის ნათესავებმა უთხრეს, რომ მასთან დაკავშირებას ვერ ახერხებენ.
