სარფის საბაჟოზე ე.წ. კოშკზე გარე ვიტრაჟების ნაწილი ლურჯი ტენტითაა დაფარული.
„დაახლოებით ორი თვეა ვაკვირდები და არაფერი შეცვლილა,“ – უთხრა „ბათუმელებს“ გოგიტა სოლომონიძემ, რომელმაც სოციალურ ქსელში საბაჟოს ფოტოები გამოაქვეყნა.
სარფის სასაზღვრო გამშვები პუნქტი ქვეყნის ერთ-ერთი ყველაზე მაღალგამტარიანი მონაკვეთია. სარფში საქართველო-თურქეთის საზღვარს ყოველდღიურად სხვადასხვა ქვეყნის ათასობით მოქალაქე კვეთს.
სარფიდან შემოდიან ტურისტებიც და ქვეყანაზე პირველი წარმოდგენაც სწორედ სარფში იქმნება.
რატომ არის ტენტი ჩამოფარებული სარფის საბაჟოს კოშკზე, ვკითხეთ შემოსავლების სამსახურს.
შემოსავლების სამსახურის განმარტებით, საბაჟოზე 2023 წლის აპრილიდან სარემონტო/სარეაბილიტაციო სამუშაოები მიმდინარეობს.
„საპროექტო სამუშაოების მიმდინარეობისას, მთლიანად განახლდა, მიწისქვეშა/საკანალიზაციო კომუნიკაციები/სანიაღვრე ქსელი. ასევე, განახლდა გზის საფარი, მოეწყო როგორც შენობის შიდა, ასევე ტერიტორიის გარე განათება. რეაბილიტაცია ჩაუტარდა ავტომობილების დასათვალიერებელ ანგარს.
აღნიშნული სამუშაოების ფარგლებში, ასევე სრულად განახლდა საზღვრის მკვეთ პირთათვის გასვლისა და შემოსვლის დარბაზები. ამჟამად, მიმდინარეობს შენობის, კერძოდ ე.წ. კოშკის გარე ვიტრაჟების თანმიმდევრული გამოცვლის პროცესი, რომლის სამუშაოებიც დაახლოებით 10 დღის ვადაში დასრულდება,“ – მოგვწერეს ჩვენი კითხვის პასუხად შემოსავლების სამსახურიდან.
სარემონტო სამუშაოები სარფის საბაჟოზე. ფოტო: შემოსავლების სამსახური
შემოსავლების სამსახურის განმარტებით, სარემონტო/სარეაბილიტაციო სამუშაოების მიუხედავად, საქართველოს საბაჟო საზღვარზე საქონლის შემოტანა-გატანა, აგრეთვე აღნიშნული საბაჟო გამშვები პუნქტის გავლით სახელმწიფო საზღვრის გადამკვეთ ფიზიკურ პირთა მიმართ საბაჟო კონტროლის პროცედურები შეუფერხებლად მიმდინარეობს.
მთავარი ფოტო: სარფის საბაჟო გამშვები პუნქტის კოშკი /გოგიტა სოლომონიძე
ამავე თემაზე:
