24 აგვისტოს უკრაინა დამოუკიდებლობის დღეს ზეიმობს. ამ თარიღის აღსანიშნავად ბათუმში საქველმოქმედო ბაზრობა და უკრაინის მხარდამჭერი აქცია გაიმართება.
დამოუკიდებლობის დღის აღნიშვნა 17:00 საათზე ევროპის მოედანზე საქველმოქმედო ბაზრობით დაიწყება.
„ჩვენი მიზანია შევაგროვოთ თანხა 100 ტაქტიკური პირველადი სასწრაფო დახმარების ნაკრების შესაძენად. ჩვენ მას გავუგზავნით უკრაინელ მებრძოლებს, რომლებიც იბრძვიან არა მხოლოდ უკრაინისთვის, არამედ მთელი თავისუფალი სამყაროსათვის,“ – ნათქვამია ორგანიზატორების მიერ გავრცელებულ ანონსში.
აქციის ორგანიზატორი „მაიდან ბათუმია“. ეს არის ორგანიზაცია, რომელიც ბათუმში მცხოვრები უკრაინელების მიერ დაარსდა მას შემდეგ, რაც რუსეთი უკრაინაში შეიჭრა და სრულმასშტაბიანი ომი დაიწყო.
უკრაინის მხარდამჭერი აქცია საღამოს 19:00 საათზე დაიწყება. ეს იქნება ერთგვარი კულტურული წარმოდგენა, რომელშიც ჩართული იქნებიან უკრაინელი ბავშვები.
„უკრაინელი პატარები წარმოადგენენ სპექტაკლს, რომლიდანაც შეიტყობთ უამრავ საინტერესო ამბავს უკრაინისა და მისი კულტურის შესახებ. მიუხედავად ომისა და ყველა იმ საშინელებისა რაც ხდება, ჩვენი ქვეყანა ცოცხალი და გაუტეხელია,“ – ნათქვამია ორგანიზატორთა განცხადებაში.
