რუსეთიდან, ქალაქ სოჭიდან გამოსული საკრუიზო გემი ბათუმში ხვალ, 27 ივლისს, ადრე დილით შემოვა.
ვებპორტალ Marine Traffic-ის მიხედვით, რომელზეც გემების მიმოსვლის შესახებ ინფორმაცია ქვეყნდება, საკრუიზო გემი ASTORIA GRANDE ბათუმში, ხვალ, დაახლოებით დილის ხუთ საათზე შემოვა.
ეს ინფორმაცია დაგვიდასტურეს ბათუმის ნავსადგურშიც.
საკრუიზო გემი ASTORIA GRANDE პალაუს დროშის ქვეშ ცურავს. ბათუმამდე ის იმყოფებოდა თურქეთის პორტ ამასრაში. ბათუმიდან გემი თურქეთში ბრუნდება. ამ გემის მგზავრები მოინახულებენ ეგვიპტეს და ისრაელს.
საკრუიზო გემის შემოსვლის შესახებ განცხადება საქართველოს საზღვაო ტრანსპორტის სააგენტომ 25 ივლისს გაავრცელა, სადაც აღნიშნული იყო, რომ „საკრუიზო გემის „ASTORIA GRANDE“-ს შემოსვლა კომერციული ხასიათისაა. იგი რეგისტრირებულია სეიშელის კუნძულებზე კომპანია „Goodwin Shipping Limited“-ის სახელით და საერთაშორისო სანქციებში არ ფიქსირდება.“
ინფორმაცია იმის შესახებ, რომ სოჭსა და ბათუმს შორის სამგზავრო გადაზიდვები იწყებოდა, 2023 წლის იანვარში გავრცელდა რუსულ მედიაში. ეს ინფორმაცია მაშინ ქართულმა მხარემ უარყო.
