ბათუმის მუნიციპალური ინსპექცია რუსულნომრიან მანქანებს არასწორი დგომისა და პარკინგის საფასურის გადაუხდელობის გამო ვერ აჯარიმებს. ამის შესახებ ბათუმის საკრებულოს სხდომაზე პარკირების დარღვევისთვის დაჯარიმების წესში ცვლილების განხილვისას იმსჯელეს. ეს ინფორმაცია არც ინსპექციის სამართლებრივი უზრუნველყოფის განყოფილების ხელმძღვანელმა, ლაშა მამულაძემ უარყო.
სხდომაზე საკრებულოს თავმჯდომარის ერთ-ერთმა მოადგილემ, ზურა ნაკაიძემ განმარტა, რომ მისი ინფორმაციით, რუსეთის, ოკუპანტი ქვეყნის მოქალაქეები, ისევე როგორც ნებისმიერი სხვა ქვეყნის ნომრიანი მანქანის მფლობელი, ჯარიმებს ქვეყნიდან გასვლისას, საბაჟოზე იხდიან. თუმცა, ეს მუნიციპალური ჯარიმა არ არის, აქ მათ ხვდებათ ე.წ. საპატრულო პოლიციის ჯარიმები, გადაადგილებისას დაფიქსირებული დარღვევების გამო და არა პარკირების დარღვევის ან მისი საფასურის გადაუხდელობის გამო დაკისრებული ჯარიმები.
„მე ვაცილებდი სტუმარს და საბაჟოზე გადაახდევინეს ჯარიმა, პატრული დახვდა ადგილზე“, – განაცხადა ზურა ნაკაიძემ. მან გააჟღერა ინიციატივა: „მივაბათ მუნიციპალური ჯარიმებიც“.
იმისთვის, რომ ინსპექციამ უცხო ქვეყნის ნომრიანი მანქანების მძღოლების დაჯარიმება შეძლოს, საჭიროა ცვლილება ადმინისტრაციულ სამართალდარღვევათა კოდექსში. ასეთი ცვლილების მომზადება შეუძლია მაგალითად რესან კონცელიძეს, რომელიც ბათუმის მაჟორიტარი დეპუტატია საქართველოს პარლამენტში. რესან კონცელიძეს ამ საკითხზე მუნიციპალურ ინსპექციასთან კონსულტაციის და, ზოგადად, კომუნიკაციის პრობლემა დიდი ალბათობით არ ექნება.
საგზაო მოძრაობის წესების დარღვევის შემთხვევაში, უცხოურნომრიანი ავტომობილების დაჯარიმებისა და შემდგომ ჯარიმების ამოღების სისტემას მნიშვნელოვანი ხარვეზები აქვს ქვეყნის მასშტაბით. პრობლემას აღიარებს შინაგან საქმეთა სამინისტროც. ამ თემაზე ვრცლად წაიკითხეთ აქ:
