„ბელარუს პოლიტიკურ აქტივისტეს საქართველოში შემოსვლაზე უარი უთხრეს,“ – აცხადებს ალექსეი პალაშოვი, იგი აჭარის რეგიონში ბელორუსი დიასპორის ხელმძღვანელია და დღეს, 28 აპრილს ბრიფინგი მოაწყო.
ალექსეი პალაშოვის თქმით, ბელარუსი პოლიტიკური აქტივისტი – ევგენი გაცაკი უკვე ორი წელია საქართველოში ცხოვრობს, რამდენიმე დღის წინ კი, თურქეთში გადავიდა – სარფის საბაჟოზე მას საქართველოში დაბრუნებაზე უარი უთხრეს.
„…საერთოდ არაფერი განუმარტეს, უკან გააბრუნეს… ის გაექცა დევნას ბელარუსში 2020 წლიდან, როგორც იცით, იქ ტერორია. შეიძლება ომიდან და მსოფლიო ვითარებიდან გამომდინარე მთლად ისე არ არის, როგორც ადრე, მაგრამ მინდა გითხრათ, რომ ჩვენთან არაფერი დასრულებულა.
მომდევნო დღეს ევგენი გაცაკმა ისევ სცადა საზღვარი გადმოეკვეთა, მას მოსთხოვეს დალოდება. ის იმყოფებოდა ნეიტრალურ ზონაში სარფის საზღვარზე მესაზღვრეებთან 5 საათზე მეტ ხანს, დასრულდა ყველაფერი იმით, რომ ის უკან გააბრუნეს თურქეთში.
ჩვენ არ ვმონაწილეობთ საქართველოს პოლიტიკურ ცხოვრებაში. ჩვენ არაფერი გვჭირდება საქართველოს საშინაო პოლიტიკისგან, ჩვენ მხოლოდ გვინდა, რომ დევნილებისთვის ეს ქვეყანა იყოს უსაფრთხო,“ – აღნიშნა ალექსეი პალაშოვმა „ბათუმელებთან“.
მთავარი ფოტო: ბელარუსიელების საპროტესტო აქცია ბათუმში
