ნეტგაზეთი • RU

უკრაინელები სპეციალური ვებგვერდით თავშესაფარს სთავაზობენ მათ, ვისაც ეს სჭირდება

უკრაინის მთავრობამ დღეს, 25 თებერვალს, სპეციალური ვებგვერდი აამუშავა, რომლითაც უკრაინელებს შეუძლიათ თავშესაფარი შესთავაზონ იმ მოქალაქეებს, რომლებიც საბრძოლო მოქმედებების ზონებში ცხოვრობენ.

„ათასობით ადამიანის სწრაფი ევაკუაცია ხდება უფრო უსაფრთხო რეგიონებში. მათ უმრავლესობას არ აქვს სივრცე, სადაც ამ რთულ პერიოდს გადაიტანენ.

დღეს ჩვენ ყველანი უნდა ვიყოთ მაქსიმალურად მობილიზებულები და ერთიანები. თუ თქვენ გაქვთ სივრცე, სადაც მზად ხართ შეიფაროთ დაზარალებული თანამოქალაქეები – დააჭირეთ ღილაკს – „თავშესაფრის შეთავაზება“, თუ გჭირდებათ თავშესაფარი, დააჭირეთ – „თავშესაფრის პოვნას“. გაერთიანდით, დაეხმარეთ და მხარი დაუჭირეთ ერთმანეთს” – წერია ვებგვერდზე.

ამ დროისთვის თავშესაფრის მაძიებლებისთვის ვებგვერდზე 762 განცხადებაა, რაოდენობა ყოველ წუთს იზრდება.

„უკრაინა რთულ პერიოდშია. გთხოვთ, დახმარების ხელი გაუწოდოთ მათ, ვინც საბრძოლო მოქმედებების ზონებიდან უფრო უსაფრთხო რეგიონებში გადადის. თუ შეგიძლიათ თანამოქალაქეების შეფარება – დატოვეთ მოთხოვნა საიტზე“ – წერს უკრაინის შინაგან საქმეთა სამინისტრო.

____________________________________________

მთავარი ფოტო: უკრაინის შს სამინისტრო.

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან