რუსული მედიის ინფორმაციით, დღეს, 21 აპრილს, უკრაინის სამხედრო დაზვერვის ხელმძღვანელს, კირილო ბუდანოვს, მოსკოვის ლეფორტოვოს სასამართლომ პატიმრობა შეუფარდა დაუსწრებლად.
უკრაინის დაზვერვის სამმართველოს ხელმძღვანელს რუსეთი ყირიმის ხიდზე „ტერორისტულ თავდასხმაში“ ადანაშაულებს.
გარდა ამისა, ბუდანოვი საერთაშორისო ძებნილთა სიაშიც მოხვდა.
ამის საპასუხოდ ბუდანოვმა აღნიშნა, რომ ეს მათი მუშაობის კარგი მაჩვენებელია და პირობა დადო, რომ კიდევ უფრო უკეთესად იმუშავებს რუსი ოკუპანტების უკრაინიდან გასაძევებლად.
„თქვენ იცით, რამდენი ხანია ვმუშაობ და რაღაცნაირად უხერხულიც კი იყო, რომ ჩემთან დაკავშირებით იქ არავითარი გადაწყვეტილება არ ჰქონდათ მიღებული. ჩემთვის სასიამოვნოა“, – განაცხადა უკრაინის დაზვერვის ხელმძღვანელმა.
2022 წლის 8 ოქტომბერს მძლავრი აფეთქება მოხდა ქერჩის [იგივე ყირიმის] ხიდზე. რომელიც რუსეთის ერთადერთი სახმელეთო დერეფანია ოკუპირებულ ყირიმთან.
რუსეთმა მაშინ განაცხადა, რომ ასაფეთქებელი ერთ-ერთ სატვირთო მანქანაში იყო მოთავსებული, რომელიც რუსეთში ლარსის გავლით შევიდა.
რუსული მედიის ცნობით, ქერჩის ხიდზე სარკინიგზო ლიანდაგის დაახლოებით 1,3 კილომეტრი დაზიანდა.
რუსეთმა სწორედ ამ აფეთქებაში დაადანაშაულა უკრაინის დაზვერვის ხელმძღვანელი, კირილო ბუდანოვი.
უკრაინის პრეზიდენტის მრჩეველი, მიხაილო პოდოლიაკი აცხადებს, რომ აფეთქება ყირიმის ხიდზე თავად რუსეთმა განახორციელა.
უკრაინელი სამხედროები კი აცხადებდნენ, რომ ყირიმის ხიდს რუსული არმია საბრძოლო მასალებისა და სამხედრო აღჭურვილობის გადასატანად იყენებდა, შესაბამისად, ლეგიტიმური სამხედრო სამიზნე იყო.
