ბათუმის საკრებულოს წევრი „ლელოდან“ ვაჟა დარჩია აცხადებს, რომ კანონპროექტი, რომელიც ბათუმში სამშენებლო ამნისტიას ითვალისწინებს, შეუსაბამო იქნება იმ დოკუმენტთან, რასაც გენგეგმაზე მომუშავე ჯგუფი წლის ბოლოს მერიას ჩააბარებს. ამასთან დაკავშირებით მან დღეს, 3 თებერვალს, ბრიფინგი გამართა.
„ყველა კომპანია, რომელიც ბათუმში ამ მიმართულებით ოპერირებს, არიან ამ მაჟორიტარების დამფინანსებლები წინასაარჩევნოდ, უმეტესობა ამ კომპანიებისა.
მთავარი პრობლემა და შეუსაბამობა არის ის, რომ ჩვენ ასეულობით ათას ლარს ვიხდით დოკუმენტში, რომელიც წლის ბოლოს იქნება მზად. ეს არის გენგეგმის ჯგუფის დოკუმენტი. ვიდრე გენგეგმაზე მუშაობა დასრულდება, ამ ინიციატივის დაკანონება არის მხოლოდ და მხოლოდ კორუფციული სქემა.
ვიღებთ დოკუმენტს, რომელიც პირდაპირ განსაზღვრავს ბათუმში უკანონო და კანონიერ მშენებლობებს. დოკუმენტზე მუშაობა აგვისტოში უნდა დასრულდეს. ასე ვთქვათ, ასწრებენ გენგეგმის მიღებამდე ამ კანონპროექტის დამტკიცებას,“ – განაცხადა საკრებულოს წევრმა.
საუბარი ეხება კანონპროექტს, რომლითაც დეპუტატები აჭარიდან სამშენებლო კოდექსში ცვლილებას სპეციალურად ბათუმისთვის კიდევ ერთხელ ითხოვენ. ცოტა ხნის წინ ცვლილება ბათუმისთვის სამშენებლო კოდექსში „ავარიული სახლების პროგრამის“ განსახორციელებლად შევიდა.
ინიციატივის ავტორები არიან: რესან კონცელიძე – ბათუმის მაჟორიტარი საქართველოს პარლამენტში, ზაალ მიქელაძე – ქობულეთის მაჟორიტარი და ანზორ ბოლქვაძე – ხელვაჩაურის, ხულოს, ქედისა და შუახევის მაჟორიტარი.
ინიცირებული პროექტით ავტორები ითხოვენ საქართველოს სივრცის დაგეგმარების, არქიტექტურული და სამშენებლო საქმიანობის კოდექსში დაემატოს 141/7 მუხლი, რაც სანებართვო პირობების დარღვევით მშენებლობის ექსპლუატაციაში მიღების დროებითი წესის დამტკიცებასაც გულისხმობს.
ბათუმის საკრებულოს წევრის, ვაჟა დარჩიას ინფორმაციით, გენგეგმაში შესაძლოა ბევრი შენობა ჩაიწეროს, როგორც შეუსაბამო კონკრეტული ზონისთვის, ამ კანონპროექტის დამტკიცებით კი, მშენებლები გენგეგმის დამტკიცებამდე შეძლებენ უკანონო შენობების დაკანონებას:
„ამიტომ ვამბობ, რომ ეს არის მოსწრება კომპანიებისთვის, რომლებიც დაახლოებულნი არიან „ოცნებასთან“ და რიგითი ბათუმელი ამისთვის სიტყვიერ თანხმობასაც ვერ მიიღებდა. მათ კი, ვისაც აქვს სიტყვიერი თანხმობა, რა თქმა უნდა, წინასწარვე იცოდნენ, რომ ეს კანონპროექტი მზადდებოდა“.
საკრებულოს წევრის შეფასებით, ამ ამბავში განსაკუთრებით საყურადღებოა ის, რომ ინიციატივების ავტორები არიან დეპუტატები, რომლებმაც კარგად იციან, რა პრობლემებია ბათუმში ქაოსური განაშენიანების გამო, თუმცა „ისინი, ამავდროულად, არიან ადამიანები, რომლებმაც საარჩევნო კამპანია ბათუმში დაიფინანსეს და დეპუტატები გახდნენ ბათუმში მოქმედი კომპანიების უმეტესობით. უმეტესობა [კომპანიების] არის მათი შემწირველი. ამიტომაც, ამ გადაწყვეტილებას დავარქვათ ხარკი მშენებლებისთვის“.
მაჟორიტარების მიერ შემუშავებული წესის მიხედვით, კოდექსში ცვლილების დამტკიცების შემდეგ, მუნიციპალური ინსპექცია უფლებამოსილი იქნება ექსპლუატაციაში მიიღოს ისეთი შენობები, რომლებიც ნებართვით აშენდა 2022 წლის 26 სექტემბრამდე და დასრულებულია. ასევე, შენობები, რომლებიც უნებართვოდ აშენდა, თუმცა დამტკიცებული განაშენიანების რეგულირების გეგმის ან განაშენიანების დეტალური გეგმის არეალშია და მათი მშენებლობა 2022 წლის 26 სექტემბრის მდგომარეობით დამთავრებულია.
ამავე თემაზე:
დეპუტატები აჭარიდან ბათუმში უკანონოდ აშენებული შენობების დაკანონებას ითხოვენ
