ფრაქცია „ქართული ოცნება – აჭარას“ თავმჯდომარის, ირაკლი ჯაშის საკანონმდებლო ინიციატივა უმაღლეს საბჭოში დღეს განიხილება. დეპუტატის ინიციატივაა, შევიდეს ცვლილება კანონში „აჭარის ავტონომიური რესპუბლიკის უმაღლესი საბჭოს არჩევნების შესახებ“, რომლის შემდეგაც აჭარის უმაღლესი საარჩევნო კომისიის თავმჯდომარის, ასევე წევრის ასარჩევად 11-ის ნაცვლად, 7 დეპუტატის თანხმობა იქნება საკმარისი. ინიციატივას საკონსტიტუციო, იურიდიულ და საპროცედურო საკითხთა კომისია განიხილავს.
„ეს აბსურდია, მაგრამ არ ვიცი წინასწარ, რა დასკვნას დადებს კომისია მსჯელობის შემდეგ,“ – ამბობს „ბათუმელებთან“ იურიდიული კომისიის თავმჯდომარე, თემურ კახიძე. მისი განმარტებით, უარყოფითი დასკვნის შემთხვევაშიც, კანონპროექტი კენჭისყრისთვის, შესაძლოა, პლენარულ სხდომაზე მაინც გავიდეს.
პროექტის დამტკიცების შემთხვევაში, უმრავლესობის არქონის მიუხედავად, „ქართულ ოცნებას“ აღარ გაუჭირდება უსკო-ს თავმჯდომარის თუ წევრის არჩევა, რაც დღემდე ვერ მოხერხდა. უსკო-ს წევრობის ერთადერთი კანდიდატი ამჯერად მამუკა ჯაშია – კანონპროექტის ავტორის, ირაკლი ჯაშის შვილი, ხოლო უსკოს თავმჯდომარეობის კანდიდატი – დავით ქარცივაძე.
იურიდიული კომისია დღეს, 25 მაისს, კიდევ ერთ კანონპროექტს განიხილავს, რომლის ინიციატორები კომისიის თავმჯდომარე თემურ კახიძე [„თავისუფალი დემოკრატებიდან“] და პეტრე ზამბახიძე [„ერთიანი ნაციონალოური მოძრაობიდან“] არიან. ინიციატივის მიხედვით, აჭარის მთავრობის თავმჯდომარეს უნდა ჰქონდეს ვალდებულება, უსკო-ს თავმჯდომარეობის მინიმუმ 2 კანდიდატი მაინც წარმოადგინოს. გარდა ამისა, უნდა შეიცვალოს იმ საკონკურსო კომისიის დაკომპლექტების წესი, რომელიც კანდიდატებს მთავრობის თავმჯდომარეს წარუდგენს. კანონპროექტის თანახმად, კომისიის ნახევარი სამოქალაქო სექტორის წარმომადგენლებმა უნდა შეავსოს: „ეს გაზრდის ნდობას ამ პროცესის მიმართ,“ – აცხადებს თემურ კახიძე.
