„საჯარო სკოლის დირექტორის შესარჩევი კონკურსის გამართვის წესში“ ცვლილება შევიდა.
ბრძანების მიხედვით, ტესტირებაზე დაგვიანების გამო დირექტორობის მსურველს უფლება არ აქვს მოითხოვოს დამატებითი ტესტირების ჩატარება, მიუხედავად იმისა, ტესტირებაზე დაგვიანება გამოწვეული იყო თუ არა საპატიო მიზეზით.
თუმცა, იმ შემთხვევაში, თუკი ტესტირებაზე აპლიკანტი ვერ გამოცხადდა COVID-19-ის დადასტურების გამო, მას სამინისტრო უფლებას აძლევს, განმეორებით გამოცდაზე გავიდეს.
„მართვის სისტემა უფლებამოსილია, დირექტორობის მსურველებისთვის, რომელთაც ვერ მოახერხეს ტესტირებაზე გამოცხადება ტესტირების დღეს ან ტესტირების დღემდე 5 დღის განმავლობაში COVID-19-ის ინფექციის დადასტურების გამო, განსაზღვროს დამატებით ტესტირების ერთი სესია.
ასევე, მართვის სისტემა უზრუნველყოფს დირექტორობის იმ მსურველთა მონაწილეობას დამატებით ტესტირებაზე, რომლებიც ვერ შეძლებენ მართვის სისტემის მიერ მითითებულ დროს ტესტირებაზე გამოცხადებას ჯანმრთელობის მდგომარეობის გამო სტაციონარულ სამედიცინო დაწესებულებაში სულ მცირე ერთი დღე-ღამით ყოფნის ან ოჯახის წევრის (მეუღლე, დედა, მამა, და-ძმა, შვილი) გარდაცვალების გამო.
ბრძანების მიხედვით, აღნიშნულმა პირებმა არაუგვიანეს 7 სამუშაო დღის ვადაში მართვის სისტემას უნდა წარუდგინონ COVID-19-ით ინფიცირების/სტაციონარულ დაწესებულებაში ყოფნის/ოჯახის წევრის გარდაცვალებისა და ნათესაობის დამადასტურებელი დოკუმენტი.
მიღებული ინფორმაცია მართვის სისტემაში ინახება ერთი წლის ვადით, ხოლო ამ ვადის გასვლის შემდეგ ნადგურდება“ – ნათქვამია ბრძანებაში.
დამატებით ტესტირების სესიაზე გამოყენებულ ტესტში მიღებული ქულები არ გათანაბრდება.
ცვლილების შესახებ ინფორმაცია განათლების სამინისტრომ 2023 წლის 27 იანვარს გამოაქვეყნა.
