შემოსავლების სამსახურის ინფორმაციით „მას შემდეგ, რაც კონტროლის პროცედურის განხორციელებაზე უფლებამოსილმა პირმა გამოავლინა საკონტროლო-სალარო აპარატის გამოუყენებლობის ფაქტი და გადასახადის გადამხდელს, გ.შ.-ს, წარუდგინა სამსახურებრივი მოწმობა, გადასახადის გადამხდელმა წარდგენილ სამსახურებრივ მოწმობას გადაუღო ფოტოსურათი. შემდგომ ეს ფოტოსურათი, სამართალდამრღვევმა გადასახადის გადამხდელმა, მადისკრედიტებელ ტექსტთან ერთად, განათავსა სხვადასხვა ვებგვერდზე და თან დაურთო მოწოდება, რომ მეწარმეებს დაემახსოვრებინათ შემოსავლების სამსახურის თანამშრომლის სახე და არ შეეშვათ სავაჭრო ობიექტზე“.
აღნიშნულ ფაქტზე შემდგომი რეაგირების მიზნით, შემოსავლების სამსახურმა მიმართა პერსონალურ მონაცემთა დაცვის ინსპექტორს. ინსპექტორის გადაწყვეტილებით, „ზემოხსენებული გადასახადის გადამხდელი ცნობილ იქნა სამართალდამრღვევად „პერსონალურ მონაცემთა დაცვის შესახებ“ საქართველოს კანონის 43-ე მუხლის პირველი პუნქტით და 44-ე მუხლის პირველი პუნქტით გათვალისწინებული ადმინისტრაციული სამართალდარღვევების ჩადენაში,“ – აღნიშნულია შემოსავლების სამსახურის განცხადებაში.
„პერსონალურ მონაცემთა დაცვის შესახებ“ საქართველოს კანონის 43-ე მუხლის პირველი ნაწილის მიხედვით, – მონაცემთა ამ კანონით გათვალისწინებული საფუძვლების გარეშე დამუშავება, იწვევს გაფრთხილებას ან დაჯარიმებას 500 ლარის ოდენობით; ხოლო 44-ე მუხლის პირველი პუნქტით – ამავე კანონით გათვალისწინებული მონაცემთა დამუშავების პრინციპების დარღვევა იწვევს გაფრთხილებას ან დაჯარიმებას ასევე 500 ლარის ოდენობით.
