ბათუმში, ხიმშიაშვილის ქუჩაზე, ყოფილი ადელის სტადიონის ტერიტორიაზე, საერთაშორისო სტანდარტის სასტუმრო კომპლექსი „Twin Tower”-ი აშენდება. სასტუმრო კომპლექსი მრავალფუნქციური იქნება და მის ტერიტორიაზე განთავსდება-რესტორნები, კაფეები, სავაჭრო-გასართობი ცენტრები, ღია და დახურული აუზები, ღია და დახურული ტერასები, სპორტულ-გამაჯანსაღებელი ობიექტები, სამედიცინო ცენტრი, სპა-სალონი, კეთილმოწყობილი ეზო, საბავშვო სათამაშო მოედნები, საკონფერენციო დარბაზები და ავტოსადგომები.
მორიგი ახალი სასტუმრო კომპლექსის საინვესტიციო ღირებულება, აჭარის მთავრობის ინფორმაციით, 120 მილიონი დოლარია. „მშენებლობას ქართული კომპანია „ორბი ჯგუფი“ ახორციელებს. კომპლექსი „Twin Tower“ ორ 45-სართულიან კორპუსს აერთიანებს, სადაც 4 500 სასტუმრო ნომერი განთავსდება. კომპლექსი მსოფლიოში მე-6 აგილზე იქნება სასტუმრო ნომრების რაოდენობის მხრივ. იგი მნიშვნელოვან როლს შეასრულებს რეგიონში განთავსების ადგილების გაზრდასა და ტურიზმის განვითარებაში. სასტუმრო კომპლექსის „Twin Tower” –ის მშენებლობა მიმდინარე წლის ივნისში დაიწყება და 19 თვეში დასრულდება. მშენებლობის პროცესში 1500, ხოლო კომპლექსის ექსპლუატაციაში შესვლის შემდეგ, 3000 ადგილობრივი დასაქმდება,“ – აღნიშნულია მთავრობის მიერ გავრცელებულ ინფორმაციაში.
დღეს, 22 მაისს, სასტუმრო კომპლექსის მშენებლობის დაწყების ცერემონიალს ესწრებოდნენ აჭარის მთავრობის თავმჯდომარე არჩილ ხაბაძე, ქალაქის მერი გიორგი ერმაკოვი, უმაღლესი საბჭოს თავმჯდომარე ავთანდილ ბერიძე და მთავრობის სხვა წევრები.
დაახლოებით თვენახევრის წინ, „ბათუმელებს“ „ორბი ჯგუფში“ უთხრეს, რომ „ადელის“ ტერიტორიაზე სასტუმრო ან/და საცხოვრებელი აპარტამენტების აშენება კონცეფციის დონეზე განიხილებოდა და კონკრეტული პროექტი ჯერ არ იყო.
მშენებლობის დაწყების ცერემონიალი / ფოტო: აჭარის მთავრობა
