ორი დღის განმავლობაში უკრაინის შეიარაღებულმა ძალებმა ხარკოვის ოლქში 20-ზე მეტი დასახლებული პუნქტი გაათავისუფლეს და 50 კილომეტრით წაიწიეს წინ. უკრაინის არმია შევჩენკოს დაკავებას და კუპიანსკისკენ შეტევის გაგრძელებას ცდილობს – ინფორმაცია მედიას გენშტაბის მთავარი ოპერატიული განყოფილების უფროსის მოადგილემ, ოლექსი გრომოვმა მიაწოდა.
გენშტაბის ცნობით, უკრაინის არმიამ 50 კილომეტრით წაიწია წინ, გათავისუფლებული ტერიტორია კი უკვე 700 კვადრატული კილომეტრია.
„აქტიური საბრძოლო მოქმედებების ფარგლებში გათავისუფლებულია 20-ზე მეტი დასახლებული პუნქტი,“ – განაცხადა გრომოვმა, თუმცა არ დაუკონკრეტებია, რომელი დასახლებები დაიკავა უკრაინის არმიამ.
აშშ-ის ომის კვლევის ინსტიტუტი უახლეს ანგარიშში წერდა, რომ 6-7 სექტემბრის განმავლობაში, უკრაინის არმიამ ხარკოვის ოლქში წარმატებული კონტრშეტევა აწარმოა და 400 კმ2 ტერიტორია დაიბრუნა.
ISW-ის ანალიტიკოსები მიუთითებენ, რომ ხერსონის ოლქში საბრძოლო მოქმედებებმა აიძულა რუსეთის არმია სამხრეთზე კონცენტრირებულიყო, ამან კი საშუალება მისცა უკრაინის ძალებს იზიუმის რაიონში ადგილობრივი, თუმცა ძალიან ეფექტიანი კონტრშეტევა დაეწყოთ.
