დიდი ბრიტანეთის დაზვერვის შეფასებით, ბოლო 30 დღის განმავლობაში რუსეთის ყველაზე წარმატებული მიმართულება დონბასში ბახმუტი იყო, სადაც რუსეთის არმიამ 10 კილომეტრით წინსვლა მოახერხა.
უწყების ცნობით, დონბასის დანარჩენ სექტორებზე, სადაც რუსეთი გარღვევის მიღწევას ცდილობდა, ამ პერიოდში მისმა ძალებმა მხოლოდ 3 კილომეტრით წაიწიეს წინ, რაც, დიდი ალბათობით, დაგეგმილზე ბევრად ნაკლებია.
„იმის მიუხედავად, რომ ამ ზონებში ინტენსიურად იყენებდა საარტილერიო ცეცხლს, რუსეთმა მაინც ვერ შეძლო საკმარისი რაოდეობით შეექმნა ქვეითთა ბრძოლისუნარიანი დანაყოფები, რათა უფრო მნიშვნელოვანი წარმატებისთვის მიეღწია,“ – წერს დიდი ბრიტანეთის დაზვერვა 9 აგვისტოს რელიზში.
უწყება აღნიშნავს, რომ შაბათ-კვირის განმავლობაში რუსეთი კვლავაც ფოკუსირებული იყო თავისი თავდაცვის გაძლიერებაზე სამხრეთ უკრაინაში, თუმცა მაინც განაგრძობდა შეტევებს უკრაინელთა პოზიციებზე.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება აღნიშნავდა, რომ რუსეთი დონბასში ქვეითსაწინააღმდეგო ნაღმებს ამონტაჟებს და დიდი ალბათობით, აკრძალულ „პეპელა ნაღმებს“ იყენებს.
