რუსული პროპაგანდისტული მედიის ცნობით, ოკუპირებული ზაპოროჟიეს პრორუსულმა ხელისუფლებამ რუსეთთან შეერთების მოთხოვნით რეფერენდუმის ჩატარების განკარგულება გამოსცა.
ოლქის მეთაურმა ევგენი ბალიცკიმ დოკუმენტს მელიტოპოლში საზოგადოებრივი მოძრაობის – „ჩვენ რუსეთთან ვართ“, ფორუმზე მოაწერა ხელი.
„ვეყრდნობით თავისუფალი არჩევანის პრინციპს, ვითვალისწინებთ ჩვენი რეგიონის თითოეული მცხოვრების აზრს და ვაცხადებთ რეფერენდუმს ზაპოროჟიეს ოლქის რუსეთის ფედერაციის შემადგენლობაში სრულფასოვანი სუბიექტის სტატუსით შესვლის შესახებ. ჩვენ ერთი ხალხი ვართ და ერთად ვიქნებით,“ – ნათქვამია განკარგულებაში.
გუშინ, საღამოს ვიდეომიმართვაში უკრაინის პრეზიდენტმა განაცხადა, რომ თუ რუსეთი ოკუპირებულ ტერიტორიებზე ფსევდორეფერენდუმებს ჩაატარებს, ამით უკრაინასთან მოლაპარაკების ყველანაირ შესაძლებლობას მოსპობს.
„ჩვენი სახელმწიფოს პოზიცია კვალავაც იგივეა, რაც მანამდე: ჩვენ არაფერს ჩვენსას არ დავთმობთ. თუ ოკუპანტები მაინც წავლენ ამ ფსევდორეფერენდუმების გზით, თვითონვე მოსპობენ უკრაინასთან და თავისუფალ სამყაროსთანმოლაპარაკების ყველანაირ შესაძლებლობას, რაც რუსეთს ადრე თუ გვიან აუცილებლად დასჭირდება,“ – განაცხადა ზელენსკიმ.
პრეზიდენტის თქმით, ზაფხულში უფრო და უფრო მეტი ცნობა გაჩნდა იმის შესახებ, რომ რუსები უკრაინის სამხრეთში რეფერენდუმების გამართვას აპირებენ.
ზაპოროჟიეს პრორუსული ხელისუფლების მტკიცებით, საარჩევნო კომისია მზადებას უკვე დაიწყებს, თუმცა უცნობია, როდის ჩატარდება რეფერენდუმი. ცნობილია, რომ რეფერენდუმს იმავე მოთხოვნით ხერსონში 11 სექტემბერს გეგმავენ.
რუსეთი ოკუპირებული აქვს ხერსონის თითქმის მთლიანი ოლქი, მისი ადმინისტრაციული ცენტრით და აკონტროლებს ზაპოროჟიეს ოლქის დაახლოებით 60 %-ს, თუმცა ქალაქი ზაპოროჟიე უკრაინელთა კონტროლქვეშ რჩება.
