დიდი ბრიტანეთის დაზვერვის ინფორმაციით, რუსეთი დონბასში ქვეითსაწინააღმდეგო ნაღმებს ამონტაჟებს. უწყების ვარაუდით, რუსეთის არმია ცდილობს, თავდაცვის ზოლის გასწვრივ გადაადგილების თავისუფლება შეინარჩუნოს.
„ამ ნაღმებმა, შესაძლოა, სერიოზული საფრთხე შეუქმნას როგორც სამხედროებს, ისე მშვიდობიან მოსახლეობას,“ – წერს უწყება 8 აგვისტოს რელიზში.
დაზვერვის ცნობით, რუსეთი მანამდე დონეცკსა და კრამატორსკში ცდილობდა PFM 1 და PFM 1S კასეტური ტიპის ნაღმების გამოყენებას. მათ „პეპელა ნაღმებს“ უწოდებენ და ძალიან საკამათო და არაპროგნოზირებად იარაღად მიიჩნევა.
„PFM 1s-ებს გამანადგურებელი ეფექტი ჰქონდა ავღანეთში საბჭოთა კავშირის ომში. უამრავი ბავშვი დაიღუპა ან დასახიჩრდა, რადგან მათ ნაღმები სათამაშოები ეგონათ“.
უწყების ვარაუდით, საბჭოთა ეპოქის მარაგები, რომლებსაც ახლა რუსეთი უკრაინაში იყენებს, კიდევ უფრო ცუდ მდგომარეობაში იქნება, რამაც შესაძლოა, დიდი ზიანი მიაყენოს ადგილობრივ მოსახლეობას და შექმნას საფრთხე განაღმვითი ოპერაციების დროს.
PFM 1 საბჭოთა და რუსული წარმოების ნაღმია, რომელიც დაახლოებით 12 სანტიმეტრი სიგრძისა და 6 სანტიმეტრი სიგანისაა. ის ძირითადად მუქი მწვანეა, ამიტომ ხშირად ამ ნაღმს „მწვანე თუთიყუშსაც“ უწოდებენ. PFM 1-ის გარჩევა და ცნობა ძალიან რთულია.
„პეპელა ნაღმების“ გამოყენება 1977 წლიდან 164-მა ქვეყანამ აკრძალა, თუმცა მათ შორის არ ყოფილა რუსეთი.
