აშშ-ის ომის კვლევის ინსტიტუტი უკრაინის ხელისუფლებაზე დაყრდნობით წერს, რომ რუსეთმა უკრანასთან ომში უკვე ჩართო ირანისგან მიღებული 46 დრონი, რომლებსაც, დიდი ალბათობით, ამერიკულ „ჰაიმარსებზე“ თავდასხმისთვის გამოიყენებს.
უკრაინის პრეზიდენტის მრჩევლის, ოლექსი არესტოვიჩის განცხადებით, უკრაინის ხელისუფლებამ ირანული დრონები უკვე დააფიქსირა.
„ირანული უპილოტო საფრენი აპარატი წინა თაობის მანქანაა, თუმცა თავისი ამოცანების ნაწილს ის მაინც ასრულებს, რადგან ამ ომში საბავშვო კვადროკოპტერებსაც კი შეუძლიათ რაღაც ამოცანების შესრულება,“ – განაცხადა არესტოვიჩმა.
ომის კვლევის ინსტიტუტის მონაცემებით, ირანის მიერ რუსეთისთვის გადაცემული დრონების ნაწილი ძველი თაობის Shahed 129-ებია. ანალიტიკოსები აღნიშნავენ, რომ უცნობია, მხოლოდ ეს 46 უპილოტო საფრენი აპარატი იყო გათვალისწინებული თეირანისა და მოსკოვის შეთანხმებით, თუ ეს რაოდენობა მხოლოდ ნაწილია.
Shahed 129 ირანული წარმოების მძიმე საბრძოლო დრონია, რომელიც ისრაელის Hermes 450-ისა და ამერიკული MQ-1 Predator-ის მიხედვითაა შექმნილი.
Shahed 129-ის კორპუსის სიგრძე 8 მეტრია, ფრთების შლა – 16 მეტრი, საბრძოლო ტვირთამწეობა 400 კგ. მწარმოებელთა მტკიცებით, ირანულ დრონს საათში 150 კმ-ს დაფარვა, ჰაერში 24 საათი გაჩერება და ფრთოსანი საავიაციო ყუმბარების გადატანა შეუძლია.
ცნობები, რომ რუსეთი ირანისგან უპილოტო საფრენი აპარატების შეძენას აპირებდა, ჯერ კიდევ ივლისის ბოლოს გაჩნდა. რუსული პროსამთავრობო მედია იუწყებოდა, რომ რუსეთში ტვირთის პირველი პარტია კასპიის ზღვის გავლით გაიგზავნა.
