„გვაჩვენოს დავით ბალაძემ კონკრეტული ციფრები და დაადასტუროს, რომ რეგიონში ნამდვილად ინვესტორების ბუმია“ – ამ მოთხოვნით „ერთიანი ნაციონალური მოძრაობის“ წევრებმა აჭარის ფინანსთა და ეკონომიკის სამინისტროსთან ბრიფინგი გამართეს. უმაღლესი საბჭოს წევრი, ეკა თარგამაძე ამბობს, რომ მათ სამინისტრო იმ ინვესტორების შესახებაც არ აწვდის ინფორმაციას, ვისაც კონკრეტული ვალდებულებები სახელმწიფოსთან აქვთ აღებული, ანუ ე.წ. სახელმწიფო ინვესტიციებზე.
რამდენიმე დღის წინ „ნაციონალური მოძრაობის“ წევრებმა ასევე გააპროტესტეს კერძო ინვესტიციების შესახებ ინფორმაციის მიუღებლობა. მაშინ აჭარის ფინანსთა და ეკონომიკის მინისტრმა დავით ბალაძემ თქვა, რომ ეს ინფორმაცია კონფიდენციალურია.
„მინისტრის განმარტება არის უსაფუძვლო და იგი პირდაპირ წინააღმდეგობაში მოდის კონსტიტუციასთან და საქართველოს ზოგად ადმინისტრაციულ კოდექსთან – ამბობს „ბათუმელებთან“ გიორგი ხიმშიაშვილი, “ახალგაზრდა იურისტთა ასოციაციის” აჭარის ფილიალის ხელმძღვანელი – ამ ტიპის განცხადება არის საშიში ტენდეციის მატარებელიც, ვინაიდან მინისტრის ამ განმარტების შინაარსით აუცილებლად იხელძღვანელებენ ის უწყებები, რომელთა კოორდინირებას ახორციელებს ეკონომიკის სამინისტრო. თუ მინისტრი ვერ იაზრებს კონსტიტუციით გარანტირებული უფლების მნიშვნელობასა და ფარგლებს, რომლის სამსახურებრივ მოვალეობაში შედის ინფორმაციის გასაჯაროება, მაშინ უფრო რთული ხდება მის დაქვემდებარებაში არსებულ უწყებებს აუხსნა საჯარო ინფორმაციის არსი და მნიშვნელობა,“ – ამბობს გიორგი ხიმშიაშვილი.
აჭარის ფინანსთა და ეკონომიკის სამინისტრო ამ დრომდე დღევანდელ ბრიფინგს არ გამოხმაურებია. ეკონომიკის სამინისტროს მონაცემებით, გასულ წელს კერძო ინვესტიციების მოცულობამ ჯამში 366 მილიონი აშშ დოლარი შეადგინა.
